स्वच्छतेतून समृद्धीकडे संगमनेरची वाटचाल! दिवाळीपूर्वी संगमनेर पॅटर्नची नवी छटा, आज निघणार ‘एक पणती स्वच्छतेची’ भव्य रॅली; यांची राहणार उपस्थिती

महाराष्ट्र संवाद न्यूज ऑनलाईन-
संगमनेर शहराला स्वच्छतेतून समृद्धीकडे नेण्यासाठी दीपावलीच्या पार्श्वभूमीवर आज दुपारी ४ वाजता यशोधन कार्यालयापासून ‘एक पणती स्वच्छतेची’ या जनजागृती रॅलीचे आयोजन करण्यात आले आहे.
काँग्रेसचे वरिष्ठ नेते, माजी मंत्री बाळासाहेब थोरात, माजी आमदार डॉ. सुधीर तांबे, माजी नगराध्यक्ष दुर्गाताई तांबे आणि आमदार सत्यजित तांबे यांच्या प्रमुख उपस्थितीत होणाऱ्या या अभियानामुळे शहरात स्वच्छतेचे एक नवे पर्व सुरू होणार आहे.
माजी मंत्री बाळासाहेब थोरात आणि माजी आमदार डॉ. सुधीर तांबे यांच्या मार्गदर्शनाखाली संगमनेर नगरपरिषदेने यापूर्वीही राज्य व राष्ट्रीय पातळीवर स्वच्छतेमध्ये उल्लेखनीय यश मिळवले आहे. तत्कालीन नगराध्यक्ष दुर्गाताई तांबे यांच्या मार्गदर्शनाखाली नागरिकांना उत्तम सुविधा देण्यासोबतच विविध पुरस्कारही प्राप्त झाले आहेत. आता दीपावलीच्या उत्साहात शहराला अधिक सुंदर आणि स्वच्छ बनवण्यासाठी नगरपालिकेने कंबर कसली आहे.
नगराध्यक्ष डॉ. मैथिलीताई तांबे यांनी संगमनेरच्या सुंदर भविष्याबाबत माहिती देताना सांगितले की, लोकनेते बाळासाहेब थोरात व आमदार सत्यजित तांबे यांच्या मार्गदर्शनाखाली पायाभूत व शाश्वत विकासाच्या योजना राबवल्या जात आहेत. सर्व नागरिकांना सोबत घेऊन संगमनेरला स्वच्छतेतून समृद्धीकडे नेण्यासाठी विविध प्रभावी उपक्रम हाती घेण्यात आले आहेत.
याच मालिकेतील ‘एक पणती स्वच्छतेची’ हे जनजागृती अभियान आज बुधवारी दुपारी ४ वाजता यशोधन कार्यालय येथून सुरू होत आहे. संगमनेरच्या पहिल्या महिला नगराध्यक्ष दुर्गाताई तांबे यांच्या शुभहस्ते या रॅलीचा शुभारंभ केला जाणार आहे.
या महत्त्वपूर्ण सोहळ्यासाठी महाराष्ट्राचे नेते बाळासाहेब थोरात, माजी आमदार डॉ. सुधीर तांबे, आमदार सत्यजित तांबे यांच्यासह डॉ. जयश्रीताई थोरात, उपनगराध्यक्ष नूर मोहम्मद शेख, सर्व सभापती, नगरसेवक, नगरसेविका, सर्व माजी नगराध्यक्ष, व्यापारी, विविध पदाधिकारी आणि मान्यवर मोठ्या संख्येने उपस्थित राहणार आहेत. संगमनेरच्या उज्ज्वल व सुंदर भविष्याच्या दृष्टीने आयोजित करण्यात आलेल्या या रॅलीमध्ये शहरातील जास्तीत जास्त नागरिक, महिला आणि युवकांनी मोठ्या संख्येने सहभागी व्हावे, असे आवाहन सर्व नगरसेवकांसह मुख्याधिकारी डॉ. दयानंद गोरे आणि नगरपरिषदेच्या अधिकारी व कर्मचाऱ्यांनी केले आहे.