महाराष्ट्र संवाद न्यूज नेटवर्क
कोल्हार-घोटी मार्गावर वडगाव पान फाटा येथे मोटार सायकल आणि डंपरच्या झालेल्या अपघातात दोन मावस भावांचा डंपर खाली सापडून मृत्यू झाला. तर एक मुलगी जखमी झाली आहे. तिच्यावर रुग्णालयात उपचार सुरू आहेत. दीपावलीच्या तोंडावर घडलेल्या या दुर्दैवी घटनेमुळे हळहळ व्यक्त होत आहे. 
अक्षय तात्यासाहेब रोकडे (रा. दुर्गापूर ता. राहाता) आणि सुनील जालिंदर लांडगे (रा. वडगाव लांडगा, ता. संगमनेर) असे मयत युवकांचे नाव आहे. तर कावेरी तात्यासाहेब रोकडे असे जखमी मुलीचे नाव आहे. ही घटना गुरुवारी (दिनांक २० ऑक्टोबर २२) सकाळी घडली. 
याबाबत समजलेली माहिती अशी, सकाळी दहा वाजण्याच्या सुमारास संगमनेर तालुक्यातील वडगाव लांडगा येथील सुनील जालिंदर लांडगे हे आपल्या मोटरसायकलवरून राहता येथे कामानिमित्ताने जात होते. त्यांच्यासोबत त्याचा मावसभाऊ अक्षय तात्यासाहेब रोकडे आणि रोकडे यांची मुलगी कावेरी तात्यासाहेब रोकडे (रा. दुर्गापुर, ता. राहता) हे होते. 
तिघेजण मोटरसायकल वरून जात असताना रस्त्याच्या परिस्थितीकडे दुर्लक्ष करत भरधाव वेगाने आलेल्या डंपरने मोटार सायकलला जोराची धडक दिली. 
याप्रकरणी संगमनेर तालुका पोलीस ठाण्यात गुन्हा दाखल करण्याचे काम सुरू आहे.
