महाराष्ट्र संवाद न्यूज नेटवर्क
शहराची सांस्कृतिक ओळख अधोरेखित करणारा आणि पहाट गाणी ही संकल्पना संगमनेरमध्ये रुजविणारा दिवाळी पहाट गाणी हा कार्यक्रम येत्या बुधवारी (दि.२६) पहाटे साडेपाच वाजता भंडारी मंगल कार्यालयात होणार आहे.
संगमनेर इतिहास संशोधन मंडळ आणि स्वसंगम संगीत प्रसारक संस्था यांच्या वतीने सादर होणाऱ्या कार्यक्रमाला संगमनेरकर रसिकांनी नेहमीप्रमाणे मोठ्या संख्येने उपस्थित रहावे असे आवाहन कार्यक्रमाचे संयोजक डॉ. संतोष खेडलेकर यांनी केले आहे.
दरवर्षी वेगवेगळ्या संकल्पना घेऊन दिवाळी पहाट गाणी हा कार्यक्रम सादर केला जातो. या वर्षी स्वरसम्राज्ञी लता मंगेशकर, ज्येष्ठ गायक भूपेन हजारिका, संगमनेरच्या भूषण गुलाबबाई संगमनेरकर हे महान कलाकार आपल्यातून गेल्याने, शाहीर साबळे यांचे हे जन्मशताब्दी वर्ष असल्याने तसेच दिवाळी पहाट गाणी ही संकल्पना संगमनेरमध्ये रुजविणारे दिवंगत कलारसिक नेते प्रेमानंद रुपवते यांच्या स्मृतीदिनानिमित्त या सर्वांना दिवाळी पहाट गाण्यातून सांगितिक आदरांजली अर्पण करण्यात येणार आहे अशी माहिती संयोजन समितीचे कार्याध्यक्ष देवीदास गोरे यांनी दिली आहे.
डॉ. संतोष खेडलेकर यांची संकल्पना व निवेदन असलेल्या या कार्यक्रमात विकास भालेराव, शीतल सराफ–पोतदार, धर्मेंद्र अभंग, अनुजा सराफ हे मराठी हिंदी गाणी सादर करणार आहेत. सत्यजित सराफ हे संगीत संयोजन करणार आहेत.
यावेळी झी मराठी वाहिनीवरील सारेगम लिटील चॅम्प कार्यक्रमात उपविजेता ठरलेल्या संगमनेर येथील सारंग भालके याचा विशेष सन्मान करण्यात येणार आहे.
कार्यक्रमाला प्रमुख अतिथी म्हणून माजी महसूलमंत्री आमदार बाळासाहेब थोरात, आमदार डॉ. सुधीर तांबे, राजहंस दुध संघाचे अध्यक्ष रणजीतसिंह देशमुख आदी मान्यवर उपस्थित रहाणार आहेत. कार्यक्रमाच्या निमंत्रक कांचनताई थोरात, माजी नगराध्यक्ष दुर्गाताई तांबे, उत्कर्षा रुपवते, धनश्री कैलास सोमाणी यांच्यासह संगमनेर इतिहास संशोधन मंडळाचे अध्यक्ष डी. बी. राठी, डॉ. अरविंद रसाळ, अशोकराव सराफ यांनी कार्यक्रमाला उपस्थित रहाण्याचे आवाहन केले आहे.
