महाराष्ट्र संवाद न्यूज नेटवर्क
नासिकहुन पुण्याला जाणारी शिवशाही बस सिन्नरहून संगमनेरच्या दिशेने येत असताना माळवाडी शिवारात या बसने पेट घेतला. बसला लागलेल्या आगीमध्ये बस पूर्णतः जळून खाक झाली असून केवळ नशीब बलवत्तर म्हणून प्रवासी बालंबाल बचावले आहेत.
सकाळी आठ वाजण्याच्या सुमारास ही दुर्घटना घडली आहे. शिवशाही बसने सकाळी सात वाजता नाशिक सोडल्यानंतर ती प्रवासी घेऊन सिन्नर स्थानकात आली होती. 
तेथून बस संगमनेरच्या दिशेने मार्गस्थ झाल्यानंतर माळवाडी शिवारामध्ये अचानकपणे धूर निघत असल्याचे बस चालकाच्या लक्षात आले. त्यामुळे तातडीने बस रस्त्याच्या कडेला उभी करण्यात आली आणि शिवशाही बसमधील सर्व प्रवाशांना खाली उतरवण्यात आले.
त्यानंतर काही क्षणातच शिवशाही बसने पेट घेतला आणि आगीच्या ज्वाळांनी बस वेढली गेली. काही क्षणातच घडलेल्या या प्रकारामुळे मासिक पुणे महामार्गावर काही काळ प्रवासी वाहतूक देखील थांबली होती. 
सुदैवाने बसमधील प्रवाशांना वेळीच खाली उतरवण्यात आल्याने सर्वजण बचावले आहेत. तर बस जळून खाक झाली आहे.
