महाराष्ट्र संवाद न्यूज नेटवर्क
संपूर्ण देशाचे लक्ष लागून असलेली आणि पंतप्रधानांचे होमपीच असलेली गुजरातची निवडणूक अखेर केंद्रीय निवडणूक आयोगाने जाहीर केली आहे. १८२ जागांसाठी दोन टप्प्यात १ आणि ५ डिसेंबरला निवडणूक घेतली जाणार आहे.
या निवडणुकीचा निकाल हिमाचल प्रदेश सोबत म्हणजेच ८ डिसेंबरला जाहीर होणार आहे.
दिल्लीत एका पत्रकार परिषदेत केंद्रीय निवडणूक आयोगाने या निवडणुकीच्या तारखा आज दुपारी जाहीर केल्या आहेत. एक आणि पाच डिसेंबर अशा दोन टप्प्यात विधानसभा निवडणूक पार पडणार आहे. पहिल्या टप्प्यात ८९ तर दुसऱ्या टप्प्यात ९३ जागांवर मतदान होणार आहे.
हिमाचलमध्ये एकाच टप्प्यात १२ नोव्हेंबरला मतदान होत असून हिमाचल आणि गुजरातची मतमोजणी एकाच दिवशी ८ डिसेंबरला होईल.
४.९ कोटी मतदार असून यात ४.६ कोटी युवा मतदार आहेत. त्यामुळे या निवडणुकीत युवकांचे मतदान निर्णायक ठरणार आहे गुजरातचा मुख्यमंत्री आणि सत्ता कोणाच्या हाती द्यायची याचा निर्णय युवा वर्गाच्या हाती असेल. 
२०१९ मध्ये झालेल्या विधानसभा निवडणुकीत भारतीय जनता पक्षाने ९९ जागांवर विजय मिळविला होता तर विरोधी ठरलेल्या काँग्रेसने ७७ जागांवर विजय मिळविला. याशिवाय दोन जागांवर भारतीय ट्रायबल पार्टी, एका जागेवर एनसीपीचा उमेदवार विजयी झाला होता. शिवाय तीन जागांवर अपक्षांनी विजय मिळविला होता. या निवडणुकीत भारतीय जनता पक्षाला १६ जागांवर फटका बसला होता. काँग्रेसच्या खात्यात या जागा वाढल्या होत्या.
आता दोन टप्प्यात होणाऱ्या निवडणुकीत भारतीय जनता पक्षाला आम आदमी पार्टी काटे की टक्कर देणार असून भाजप, आम आदमी पार्टी आणि काँग्रेस अशी तिरंगी लढत होणार आहे. काँग्रेस सोबतच आपने भाजपची डोकेदुखी वाढविली आहे. आम आदमी पार्टी सर्वाधिक मोठा पक्ष म्हणून पुढे येण्याची शक्यता चाचणी कलांमध्ये दिसून येत आहे. आम आदमी पार्टीच्या निवडणुकीतील जोरदार एंट्रीने निवडणुकीतील समीकरणे बदलण्याचे चिन्ह निर्माण झाले आहे. आम आदमी पार्टीचे प्रमुख अरविंद केजरीवाल यांनी दिल्ली व पंजाब प्रमाणेच गुजरातमध्ये मोफत वीज, पाणी, शिक्षण, आरोग्य अशी आश्वासने दिली आहेत.
पंतप्रधान नरेंद्र मोदी आणि गृहमंत्री अमित शहा यांच्या होमपीच वर होत असलेल्या या निवडणुकीकडे संपूर्ण देशाचे लक्ष लागलेले आहे. 
