महाराष्ट्र संवाद न्यूज नेटवर्क
संगमनेरमधून वाहणाऱ्या अमृतवाहिनी प्रवरा नदीमध्ये मोठ्या पुलाजवळ काही अंतरावर शुक्रवारी सकाळी दोन मृतदेह आढळून आले. यामुळे एकच खळबळ उडाली आहे. हे मृत्यू नेमके कशामुळे झाले याचा शोध घेण्याचे आव्हान शहर पोलिसांसमोर निर्माण झाले आहे.
शुक्रवारी सकाळी प्रवरा नदीपात्रातील मोठ्या पुलाखाली आणि तेथून काही अंतरावर असलेल्या फादरवाडी जवळ नदीपात्रात दोन पुरुषांचा मृतदेह आढळून आला शहर पोलिसांना याची माहिती मिळताच पोलीस पथकाने घटनास्थळी जाऊन मृतदेह नदीपात्रातून काढत शवविच्छेदनासाठी नगरपालिकेच्या विच्छेदन गृहामध्ये आणले होते.
दरम्यान दोन मृतदेंपैकी एकाची ओळख पटविण्यात पोलिसांना यश आले असून हा मृतदेह शहरातीलच मोगलपुरा पुणे नाका येथील अमोल अण्णासाहेब आव्हाड याचा असल्याचे स्पष्ट झाले आव्हाड बेपत्ता झाल्या संदर्भात शहर पोलीस ठाण्यात नोंद करण्यात आली होती. 
तर दुसऱ्या मृतदेहाची ओळख पटली नसून साधारणता 35 वर्षे वयोगटातील हा तरुण आहे. यासंदर्भात अधिक माहिती असल्यास शहर पोलिसांशी संपर्क साधण्याचे आवाहन करण्यात आले आहे.
एका मृतदेहाची ओळख पटली असली तरी दुसऱ्या हृदयाची ओळख पटविण्याचे काम सुरू असून या दोघांचाही मृत्यू नेमका कशामुळे झाला याचा उलगडा शव विच्छेदन अहवाल आल्यानंतर होणार आहे. दोन्ही मृता संदर्भात शहर पोलीस ठाण्यात आकस्मित मृत्यूची नोंद करण्यात आली असल्याची माहिती देण्यात आली. पोलीस निरीक्षक राजेंद्र भोसले यांच्या मार्गदर्शनाखाली पोलीस हवालदार अमित महाजन, पोलीस कर्मचारी निलेश धादवड पुढील तपास करत आहेत.
