महाराष्ट्र संवाद न्यूज नेटवर्क
बक्षीसपत्राने दिलेल्या जमिनीची सातबारा उताऱ्याव नोंद करण्याचे आदेश देण्यासाठी मॅडमनी एका मध्यस्थाच्या मार्फत तब्बल ५ लाखाची लाच मागितली. दुसऱ्या दिवशी ही रक्कम ३ लाखावर आली आणि २ लाख रुपयांची रोकड स्विकारतांना मध्यस्थ लाचलुचपतच्या जाळ्यात अडकला. मध्यस्थ जाळ्यात अडकताच तहसिलदार मॅडमच्या घरी लाच लुचपतने छापा टाकला आणि मॅडमलाही ताब्यात घेतले. नंतर मॅडमच्या घराची झडती घेतली असता तेथे ७५ हजाराची तर मुंबईतील विक्रोळी येथील घरात एक कोटीहून अधिक रोख रक्कम सापडली. संपत्तीची मोजदाद सुरु केल्यानंतर मॅडमकडे तब्बल ६० तोळे सोने असल्याचे आढळून आले.
एखाद्या सामान्य अधिकाऱ्याची ही कथा नाही तर ती आहे अलिबागच्या महिला तहसिलदारांची. मिनल कृष्णा दळवी (वय ४९ वर्षे) असे या लाचखोर तहसिलदारांचे नांव असून राकेश रमाकांत चव्हाण (वय ४९ वर्षे) असे मध्यस्थ एजंटाचे नांव आहे. लाचलुचपतच्या अधिकाऱ्यांनी दोघाही लाचखोरांना अटक केली आहे. दळवी यांना अटक केल्यानंतर त्यांना उच्च रक्तदाबाचा त्रास होवू लागल्याने ताबडतोड जिल्हा रुग्णालयात उपचारासाठी दाखल करण्यात आले.
अलिबाग तालुक्यातील मांडवा कोळगांव येथील जमिनीच्या बक्षीसपत्राच्या नोंदीचे प्रकरण तहसिलदार मीनल दळवी यांच्याकडे दाखल झाले होते. सातबारावर नोंद करण्यासाठी तहसिलदार दळवी यांनी संबधीताच्या नातेवाईकाकडे आधी पाच लाख व नंतर तीन लाखाची लाच मागितली होती. दोन लाखावर तडजोड झाल्यानंतर दळवी यांनी सदरची रक्कम एजंट राकेश चव्हाण याच्याकडे देण्यास सांगीतले होते. त्यामुळे तक्रारदाराने २८ सप्टेंबरला नवी मुंबईच्या लाच लुचपत प्रतिबंधक विभागाशी संपर्क करत तक्रार नोंदविली होती.
लाचलुचपतच्या अधिकाऱ्यांनी २९ सप्टेंबर रोजी तक्रारीची पडताळणी केली. शुक्रवारी (ता. ११ नोव्हेंबर) एजंट चव्हाण हा लाचेची रक्कम स्विकारण्यासाठी तक्रारदाराच्या मोबाईल विक्रीच्या दुकानात आला होता. तेथे सायंकाळी लाचेची रक्कम स्विकारतांना त्याला रंगेहाथ पकडण्यात आले. त्यानंतर दळवी यांना त्यांच्या राहत्या घरुन ताब्यात घेण्यात आले. मात्र त्यांना उच्च रक्तदाबाचा त्रास झाल्याने अलिबागच्या सरकारी रुग्णालयात दाखल करण्यात आले.
याशिवाय दळवी यांच्या विक्रोळी येथील घरातून मोठे घबाड तपास यंत्रणेच्या हाती लागले आहे. एक कोटी रुपयांची रोख रक्कम तसेच काही महत्वाचे दस्तावेज तपास यंत्रणेला मिळाले असून अलिबागच्या घरात ६० तोळे सोन्याचे दागिने सापडल्याची माहिती लाचलुचपत प्रतिबंधक नवी मुंबई विभागाच्या पोलीस ज्योती देशमुख यांनी दिली आहे. शनिवारी दोन्ही लाचखोरांना न्यायालयात आणले असता विशेष सत्र न्यायाधीशांनी दोन्ही बाजूंचा युक्तीवाद ऐकल्यानंतर सोमवारपर्यत दोन्ही आरोपींना पोलीस कोठडीत ठेवण्याचे आदेश दिले.
