महाराष्ट्र संवाद न्यूज नेटवर्क
शिवसंग्रामचे अध्यक्ष विनायक मेटे यांच्या अपघात प्रकरणी वाहन चालकाची सखोल चौकशी केल्यानंतर चालकाच्या चुकीमुळे अपघात झाल्याचा निष्कर्ष सीआयडीने काढला आहे. याप्रकरणी मेटे यांच्या चालका विरोधात रसायनी पोलीस ठाण्यामध्ये सदोष मनुष्यवधाचा गुन्हा दाखल करण्यात आला आहे.
14 ऑगस्टला मुंबई-पुणे द्रुतगती महामार्गावर शिवसंग्राम संघटनेचे प्रमुख विनायक मेटे (52) यांचा अपघाती मृत्यू झाला होता. मराठा समाजाच्या सरकारी नोकऱ्या आणि शिक्षणात आरक्षणाचे कट्टर समर्थक असलेले माजी विधान परिषद सदस्य विनायक मेटे हे मराठ्यांच्या नोकरीतील टक्क्याच्या मुद्द्यावरच्या बैठकीला उपस्थित राहण्यासाठी मुंबईला जात होते. यादरम्यान त्यांचा रस्ते अपघातात मृत्यू झाला.
पाच वेळा विधान परिषदेचे सदस्य राहिलेले मेटे हे शिवसंग्राम पक्षाचे अध्यक्ष होते. मुंबईत समुद्राखाली बांधण्यात येणाऱ्या शिवस्मारक समितीचेही ते अध्यक्ष होते. 
मराठा आरक्षणासंदर्भात मुख्यमंत्री एकनाथ शिंदे यांनी बोलावलेल्या महत्त्वाच्या बैठकीला उपस्थित राहण्यासाठी बीडहून मुंबईकडे जात असताना मुंबई-पुणे द्रुतगती मार्गावर पहाटे साडेपाच वाजण्याच्या सुमारास एका ट्रकने त्यांच्या कारला ओव्हरटेक केले, त्यामुळे कार चालकाचे नियंत्रण सुटले आणि हा अपघात झाला.
या अपघातात त्यांचा मृत्यू झाला. मुख्यमंत्री एकनाथ शिंदे यांनी यासंदर्भात सीआयडी चौकशीचे आदेश दिले होते. मेटे यांच्या कार चालकाविरोधात गुन्हा दाखल करण्यात आला असला तरी तपास मात्र सीआयडीकडेच राहणार आहे.
