यापुढे बेताल वक्तव्य कराल तर राज्यात फिरू देणार नाही; तुमचं धोतर फेडल्याशिवाय राहणार नाही
महाराष्ट्र संवाद न्यूज नेटवर्क
महाराष्ट्राच्या अस्मितेविरोधात सातत्याने बेताल वक्तव्य करणाऱ्या राज्यपाल भगतसिंग कोश्यारी आणि भाजप खासदार सुधांशू त्रिवेदी यांच्या विरोधात शिवसेना ठाकरे गटाने सोमवारी अनोखे आंदोलन केले. डमी राज्यपालांच्या वेशात धोतर, टोपी आणि कोट घालत आंदोलन स्थळी आलेले शिवसेना शहर प्रमुख अमर कतारी यांनी छत्रपती शिवाजी महाराजांच्या पुतळ्यासमोर नतमस्तक होत राज्यपाल कोश्यारी छत्रपतींची माफी मागत असल्याचा प्रसंग उभा केला.
वारंवार आपल्या वादग्रस्त विधानांमुळे टीकेचे लक्ष होणारे महाराष्ट्राचे महामहीम राज्यपाल भगतसिंग कोश्यारी यांनी नुकतेच “शिवाजी महाराज हे जुन्या काळचे आदर्श होते” असे वादग्रस्त विधान करून पुन्हा महाराष्ट्रातील तमाम शिवप्रेमींच्या भावना दुखावल्या. कोश्यारी यांच्या पाठोपाठ भाजप खासदार सुधांशू त्रिवेदी याने देखील छत्रपती बद्दल गरळ आहे. या दोघांच्या विधानाचा राज्यभरातून निषेध सुरू असताना संगमनेर देखील शिवसेना ठाकरे गटाने बस स्थानक चौकात हे आंदोलन केले. आंदोलकांनी राज्यपालांना भाज्यपाल असे संबोधत कोश्यारी आणि भाजप खासदार सुधांशू त्रिवेदी यांच्या विरोधात निषेधाच्या घोषणा दिल्या.
कधी “समर्थ के बिना कौन शिवाजी को पुँछेंगा” तर कधी “मुंबईतून गुजराती आणि राजस्थानी लोकांना बाहेर काढलं तर मुंबईत पैसा शिल्लक राहणार नाही, त्यामुळे मुंबईला देशाची आर्थिक राजधानी देखील कुणी म्हणणार नाही” अशी वादग्रस्त विधाने या पूर्वीही राज्यपालांनी केली. दोन दिवसांपूर्वी औरंगाबादमध्ये पुन्हा असेच बेताल वक्तव्य करत छत्रपतींची तुलना नितीन गडकरी, शरद पवारांशी केली. यामुळे राज्यात संतापाची लाट उसळली आहे. भाजप वगळता सर्वच राजकीय पक्ष राज्यभर त्यांचा निषेध करत आहे.
आंदोलनावेळी शिवसेना युवा सेना महिला आघाडी यांच्यासह सर्व अंगिकृत संघटनांचे पदाधिकारी व शिवसैनिक यावेळी मोठ्या संख्येने उपस्थित होते. शहर प्रमुख कतारी यांच्यासह उपजिल्हाप्रमुख भाऊसाहेब हासे, उपजिल्हाप्रमुख मुजीब शेख, नागपूरचे संपर्कप्रमुख नरेश माळवे, गोविंद नागरे यांनी आपल्या भाषणातून इशारा दिला की, राज्यपाल कोश्यारी यांनी जर पुन्हा अशा प्रकारचे बेताल वक्तव्य केले तर, त्यांना महाराष्ट्रात छत्रपतीप्रेमी मावळे शिवसैनिक फिरू देणार नाही, त्यांच धोतर फेडल्याशिवाय राहणार नाही. 
यावेळी युवासेना शहर प्रमुख अमोल डुकरे, शिवसेना उपशहर प्रमुख वेणूगोपाल लाहोटी, दीपक वन्नम, इम्तियाज शेख, कार्याध्यक्ष दिपक साळुंके, फैसल सय्यद, महिला आघाडीच्या सुरेखा गुंजाळ, आशा केदारी, संगीता गायकवाड, युवासेनेचे गोविंद नागरे, सुदर्शन इटप, अक्षय बिल्लाडे, फरोज कतारी, संकेत खुळे, वैभव अभंग, संभव लोढा, पठार भागाचे ज्येष्ठ शिवसैनिक रंगनाथ फटांगरे, एस. पी. रहाणे, युवासेना तालुकाप्रमुख योगेश खेमनर, युवासेना विधानसभा प्रमुख राजू सातपुते, अक्षय गाडे, लक्ष्मण सोन्नर, निलेश रहाणे, शिवसेना शाखाप्रमुख अजीज मोमीन, विद्यार्थी सेनेचे सचिन साळवे, कार्यालयीन प्रमुख बंडू म्हाळस, रिक्षासेनेचे बढे, भगवान पोपळघट, माधव फुलमाळी, शहर समन्वय असिफ तांबोळी, अक्षय गुंजाळ, नारायण पवार, निलेश गुंजाळ, प्रकाश चोथवे, विभागप्रमुख विजय भागवत, जयदेव यादव, दानिश पारवे, अल्ताफ शेख, प्रतीक मिसाळ उपस्थित होते.
