महाराष्ट्र संवाद न्यूज नेटवर्क
काँग्रेस विधिमंडळ पक्षनेते आमदार बाळासाहेब थोरात यांच्या नेतृत्वाखाली देशभरातील सहकारी साखर कारखान्यांसाठी अनुकरणीय व आदर्शवत ठरलेल्या संगमनेरच्या सहकार महर्षी भाऊसाहेब थोरात सहकारी साखर कारखान्याने आत्तापर्यत उच्चांकी भावाची परंपरा जपली आहे. कारखान्यात गाळपासाठी येणाऱ्या या चालू हंगामाकरीता पहिली उचल २५०० रुपये प्रति टन जाहीर करण्यात आली असल्याची माहिती कारखान्याचे अध्यक्ष बाबासाहेब ओहोळ यांनी दिली.
स्वातंत्र्य सेनानी सहकार महर्षी भाऊसाहेब थोरात यांच्या आदर्श तत्त्वांवर संगमनेरच्या सहकाराची वाटचाल सुरू असून थोरात सहकारी साखर कारखान्याने शेतकरी, सभासद, व कामगारांचे हित जोपासताना कायम उच्चांकी भाव दिला आहे. मागील वर्षी सन २०२१-२०२२ या हंगामामध्ये १५ लाख ५३ हजार मेट्रीक टनाचे उच्चांकी गाळप केले. याचबरोबर कारखान्याला राष्ट्रीय पातळीवरील गुणवत्तेचा पुरस्कारही मिळाला आहे. दिवाळीमध्ये शेतकरी, कामगार, ऊस उत्पादक यांच्याकरिता कारखान्याने एकत्रित २६ कोटी रुपये बँकेत वर्ग केले होते. त्यामुळे तालुक्यातील शेतकऱ्यांमध्ये समाधानाचे वातावरण होते. कामगारांना दिवाळीत २० टक्के बोनससह ३० दिवसांचे सानुग्रह अनुदानही दिले आहे.
कार्यक्षेत्रासह सर्वत्र ऊस लागवड मोठ्या प्रमाणात होत असून ऊस हे शाश्वत उत्पादन देणारे पीक आहे. उत्पादन वाढीकरीता कारखान्याच्यावतीने विविध उपक्रम राबविण्यात येत आहेत. सातत्याने एफआरपी पेक्षा जास्त भाव देताना यावर्षीही कार्यक्षेत्रातील व बाहेरील शेतकऱ्यांना प्रति टन २५०० रुपये पहिली उचल कारखान्याने जाहीर करण्याचा एक कौतुकास्पद निर्णय घेतला आहे. २५०० रुपयांप्रमाणे कारखान्याने उचल देण्याच्या घेतलेल्या या कौतुकास्पद निर्णयाबद्दल मार्गदर्शक आमदार बाळासाहेब थोरात,अध्यक्ष बाबासाहेब ओहोळ, उपाध्यक्ष संतोष हासे यांच्यासह संचालक व कार्यकारी संचालक जगन्नाथ घुगरकर यांचे शेतकरी व ऊस उत्पादक यांनी आभार मानले आहे.
