महाराष्ट्र संवाद न्यूज नेटवर्क
जिल्ह्यात अवैध मद्यविक्री करणाऱ्या हॉटेल, ढाबे, चायनीज गाड्यांसह सहा अवैध मद्य विक्रेत्यांसह पिणाऱ्यांविरोधात दंडात्मक कारवाई करण्यात आल्याची माहिती राज्य उत्पादन शुल्क विभागाचे अधीक्षक गणेश पाटील यांनी दिली आहे. याशिवाय जिल्ह्यात अवैध मद्य विक्री होत असल्याची माहिती असल्यास राज्य उत्पादन शुल्क विभागाशी संपर्क साधण्यासाठी टोल फ्री व मोबाईल क्रमांक जाहीर करण्यात आले आहे.
अवैध मद्यविक्री करणाऱ्यांवर तसेच अवैधरित्या मद्य पिणाऱ्यांवर न्यायालयाच्या आदेशावरुन नगर जिल्ह्यात कारवाया सुरु करण्यात आल्या आहे. मद्य पिण्यासाठी जागा उपलब्ध करुन देणाऱ्या जागामालकांवर दंडात्मक कारवाई करण्यात आली आहे.
यात नगरच्या हॉटेल साहिबाच्या मालकास २५ हजार रुपयांचा दंड, तेथे मद्य पिणाऱ्या चार जणांना प्रत्येकी १ हजार रुपये दंड, शेवगांव-पैठण रोडवरील खानापूर येथील हॉटेल पंजाबी ढाबा येथे मद्य पिणाऱ्या तीघा जणांकडून प्रत्येकी १ हजार रुपये दंड, नेवासे येथील घोडेगाव-कुकाणे रोडवरील हॉटेल विजय येथे मद्य पिणाऱ्या तिघांना प्रत्येकी दीड हजार रुपये दंड आकारण्यात आला असून नगरच्या सावेडीमधील हॉटेल संकल्पच्या चालकास २५ हजार रुपये दंड करण्यात आला आहे. याशिवाय येथे मद्य पिणाऱ्या ९ जणांकडून प्रत्येकी दोन हजार रुपयांचा दंड वसूल करण्यात आला. अकोले तालुक्यातील खिरविरे येथील हॉटेल शेवटी नसीबच्या मालकास देखीलल २५ हजार रुपयांचा दंड आकारण्यात आला असून तेथे मद्य पिणाऱ्या तीघांकडून प्रत्येकी १ हजार, नगरच्या मनोहर वाईन्सशेजारील हॉटेल चंद्रमा व नगर-पुणे रस्त्यावरील हॉटेल जत्रा यांच्यावर कारवाई करत यासंबधी न्यायालयाकडून आदेश प्राप्त करुन घेण्याची कार्यवाही सुरु असल्याचे पाटील यांनी म्हटले आहे.
अवैध मद्य विक्रीवर जिल्ह्यात कारवाई सुरु राहणार असून अवैध मद्य विक्रीचे समूळ उच्चाटन करण्यासाठी राज्य उत्पादन शुल्क विभागाच्या कारवाया सुरु आहेत. नववर्षाच्या पार्श्वभूमीवर जिल्ह्यात अवैध मद्य विक्री करणाऱ्यांवर कारवाई केली जाणार असून आपल्या गावात अथवा परिसरात अवैध मद्यविक्री सुरु असल्याचे निदर्शनास आल्यास नागरिकांनी १८००२३३९९९९ या टोल फ्री क्रमांकावर अथवा ८४२२००११३३ या व्हॉटस्अप क्रमांकावर तक्रार करण्याचे आवाहन करण्यात आले आहे. 
