महाराष्ट्र संवाद न्यूज
नव्याने बांधण्यात येणाऱ्या इमारतीच्या कामावर असलेल्या सुरक्षारक्षकासह त्याच्या साथीदाराला लोखंडी गजाने मारहाण करून मोबाईल लंपास करणाऱ्या आरोपीचा शोध लावण्यास तब्बल पाच महिन्यानंतर पोलीस उपाधीक्षकांच्या पथकाला यश आले आहे.
ऋषिकेश सदाशिव वाव्हळ (वय २३ वर्ष) या तरुणाला पोलीस उपाधीक्षकांच्या पथकाने अटक केली आहे. राजेंद्र होंडा शोरूम च्या पाठीमागे असलेल्या एका इमारतीचे बांधकाम सुरू असताना लक्ष्मण चांगदेव फटांगरे हे सुरक्षारक्षक म्हणून काम करत होते. यावेळी त्यांच्यासह आणखी एक सहकारी होता. ५ जुलैला रात्री अडीच वाजण्याच्या सुमारास त्यांना हालचाल जाणवली, त्यामुळे त्यांनी संबंधित व्यक्तीला हटकले असता तेथे असलेल्या लोखंडी गजांची चोरी करण्याचा प्रयत्न असलेल्या चोरट्याने त्यांच्या डोक्यात गजाने प्रहार केला.
त्यानंतर त्याने जखमी झालेल्या फटांगरे यांच्या जवळील मोबाईल घेऊन घटनास्थळावरून पळ काढला होता. या संदर्भात संगमनेर शहर पोलीस ठाण्यात अज्ञात आरोपी विरोधात गुन्हा दाखल करण्यात आला होता.
पोलीस अधीक्षक राकेश ओला, अप्पर पोलीस अधीक्षक स्वाती भोर यांनी संगमनेरचे प्रभारी पोलीस उपाधीक्षक संजय सातव यांना तपासा संदर्भात सूचना केल्या होत्या. उपाधीक्षक सातव यांनी आपल्या पथकातील पोलीस कर्मचारी अण्णासाहेब दातीर, फुरखान शेख, अमृत आढाव, सुभाष बोडखे, प्रमोद गाडेकर यांच्यावर आरोपीचा शोध घेण्याचे जबाबदारी सोपविली होती. तब्बल पाच महिन्यांनी तांत्रिक तपासावरून संबंधित मोबाईल पाथर्डी येथे असल्याचे लोकेशन पथकाला मिळाले. पोलीस पथकाने पाथर्डी येथे जात संबंधित मोबाईल वापरणाऱ्या महिलेकडे चौकशी केली असता आपल्या भावाने हा मोबाईल दिल्याचे सांगितले.
त्यानंतर पोलिसांनी संगमनेरमधून आरोपी ऋषिकेश सदाशिव वाव्हळ याला अटक करत शहर पोलिसांच्या हवाली केले आहे. पुढील तपास पोलीस उपनिरीक्षक बारकू जाणे करीत आहेत.
