महाराष्ट्र संवाद न्यूज
संगमनेरमधील बेकायदेशीर कत्तलखाने नेस्तनाबूत करण्यास प्रशासनाला अपयश आले आहे. त्यामुळे येथील बेकायदेशीर कत्तलखाने आणि गोमांस वाहतुकीच्या टीप आता वरिष्ठांना दिल्या जाऊ लागल्या आहे. अशाच एका टीप वरून नगरच्या स्थानिक गुन्हे शाखा आणि पोलीस उपाधीक्षकांच्या पथकाने केलेल्या संयुक्त कारवाई एक हजार किलो गोमांसासह साडेआठ लाख रुपयांचा मुद्देमाल पथकाच्या हाती लागला आहे.
शंकर चौधरी, संतोष लोंढे, भाऊसाहेब साळुंखे, विनायक चव्हाण व बबन बेरड या नगरच्या स्थानिक गुन्हे शाखेचे पोलीस कर्मचारी जिल्ह्यात अवैध धंद्यांवर कारवाईसाठी पेट्रोलिंग करत असताना गुन्हे शाखेचे पोलीस निरीक्षक यांना संगमनेरमधून जनावराच्या मांसाची वाहतूक होणार असल्याची टीप मिळाली होती. त्यांनी ही माहिती वस्तीवरील पथकाला देत कारवाई करण्याचे आदेश दिले. पथकाने पोलीस उपाधीक्षकांचा तपास पथकातील पोलीस कर्मचारी अण्णासाहेब दातीर, सुभाष बोडखे, प्रमोद गाडेकर, अमृत आढाव यांना सोबत घेत कारवाईसाठी रवाना झाले.
स्थानिक गुन्हे शाखा आणि पोलीस उपाधीक्षकांच्या तपास पथकातील कर्मचाऱ्यांनी जोर्वे नाका येथे सापळा लावत संकेत वाहनांची प्रतीक्षा सुरू केली. मंगळवारी पहाटे एक वाजण्याच्या सुमारास संशयित झायलो गाडी आणि त्या पाठोपाठ एक छोटा हत्ती येताना दिसला. कर्मचाऱ्यांनी झायलो गाडी अडवत त्याच्याकडे विचारणा सुरू करताच पाठीमागील छोटा हत्ती मध्ये असलेला चालकाने तेथून पलायन केले.
पथकाने वाहनांची तपासणी केली असता त्यामध्ये त्यांना गोवंश जनावरांचे मांस आढळून आल्याने पोलिसांनी दोन्ही वाहने, त्यातील मांस आणि झायलो चालकास ताब्यात घेतले.
पोलीस चौकशीमध्ये झायलो चालकाचे नाव सलमान नजीर शेख, पळून गेलेल्या छोटा हत्ती चालकाचे नाव बुंदी उर्फ मुदस्सर करीम कुरेशी असे असल्याचे निष्पन्न झाले. तर छोटा हत्ती वाहनांमध्ये ४०० किलो मांस आणि झायलो मध्ये ६०० किलो मांस आढळून आले. तसेच दोन्ही वाहनांमधील मांस हे पळून गेलेला आरोपी बुंदी उर्फ मुदस्सर करीम कुरेशी याचा असल्याचे निष्पन्न झाले आहे. स्थानिक गुन्हे शाखेचे पोलीस कर्मचारी सचिन आडबल यांच्या फिर्यादीवरून आरोपी विरोधात शहर पोलीस ठाण्यात गुन्हा दाखल करण्यात आला आहे.
