महाराष्ट्र संवाद न्यूज
नाशिकच्या शिंदे-पळसे टोल नाक्यावरील एसटी बसची थरारक दुर्घटना ताजी असतानाच शुक्रवारी सिन्नरच्या मोहदरी घाटात तीन वाहनांच्या विचित्र अपघातात पाच जणांचा मृत्यू झाल्याची माहिती समोर येत आहे.
अपघातातील मृतक महाविद्यालयीन विद्यार्थी असून ते नाशिकच्या नामांकित महाविद्यालयात शिक्षण घेत होते. मिळालेल्या माहितीनुसार आठ-नऊ विद्यार्थी स्विफ्ट कारने एका मित्राच्या विवाह सोहळ्यानिमित्त संगमनेरला आले होते.
विवाह सोहळा आटोपून सायंकाळच्या वेळी ते पुन्हा नाशिकला परतत असताना सिन्नरच्या मोहदरी घाटामध्ये गणपती मंदिराजवळ त्यांच्या कारचा टायर अचानक फुटला. कार विरुद्ध दिशेला जात डिव्हायडर ओलांडून दुसऱ्या लेनवर जाऊन समोरून येणाऱ्या इनोव्हा आणि स्विफ्ट जाऊन धडकली. त्यामुळे विचित्र पद्धतीने झालेल्या तीन वाहनांच्या अपघातात पाच जणांचा मृत्यू झाला आहे. यामध्ये काही विद्यार्थ्यांचा समावेश असल्याचं देखील सांगितलं जात आहे.
अपघात इतका भीषण होता की, अपघातग्रस्त कारचा चक्काचूर झाला असून दुसऱ्या दोन्ही वाहनांचे मोठ्या प्रमाणात नुकसान झाले आहे. अपघातात तीन मुली आणि दोन मुलांचा मृत्यू झालेल्यात समावेश असल्याची प्राथमिक माहीती समोर आली आहे. घटनास्थळी आलेल्या मदत पथकाने अपघातग्रस्त वाहने रस्त्यातून बाजूला केल्यानंतर वाहतूक सुरळीत होण्यास सुरुवात झाली होती.
अपघातात हर्षल बोडके, मयुरी पाटील, शुभम ताडगे आणि अन्य दोन विद्यार्थ्यांचा जागीच मृत्यू झाला. तर साक्षी घायाळ, साहिल वरके, गायत्री फड आणि इनोव्हा कारमधील सुनील दत्तात्रय दळवी व अन्य दोन तीन जण गंभीर जखमी झाले आहेत. काही जखमींना सिन्नर येथील खाजगी रुग्णालयात तर काहींना नाशिकच्या खाजगी रुग्णालयात उपचारासाठी दाखल करण्यात आले आहे.
