महाराष्ट्र संवाद न्यूज
त्या अबोल तारा छेडल्यानंतर उमटलेले शब्द, बोल, ताल आणि लय यांनी उपस्थित विद्यार्थ्यांच्या मन, मेंदू आणि हृदयाच्या तारा छेडल्या. ‘झणझण छेडल्या तारा, बरसती अमृतधारा’ याची साक्षात अनुभूती घेत उपस्थित विद्यार्थ्यांसह सुमारे दोन तास सगळेच मंत्रमुग्ध झाले. सतारीच्या त्या स्वर्गीय स्वरांची जादू उपस्थितांच्या मनावर कायमची कोरली गेली.
निमित्त होते विदुरजी कृष्णनाथ महाजन यांच्या सतारवादन कार्यक्रमाचे. संगमनेर तालुक्यातील पिंपरणे येथील प.पू. गगनगिरी महाराज विद्यालय या उपक्रमशील शाळेत या कार्यक्रमाचे आयोजन करण्यात आले होते. संगमनेर महाविद्यालय शाळा समूह योजनेच्या वतीने आयोजित ‘सतारवादन आणि विद्यार्थी संवाद’ असे या कार्यक्रमाचे स्वरूप होते. शैक्षणिक संकुलाचे अध्यक्ष बापूसाहेब देशमुख, उपाध्यक्ष कैलास काळे, महाविद्यालयाचे प्राचार्य मुकुंद डांगे, किरण झंवर, मंजुषा नावंदर आदी कार्यक्रमास उपस्थित होते.
या कार्यक्रमात महाजन यांनी सतारीची रचना, त्यावरील सप्तसुरांची मांडणी, तारा, खुंट्या,भोपळा या सर्वांची माहिती विद्यार्थ्यांना दिली. सतारीचा इतिहास, भारतीय राग व संगीताचा परिचय महाजन यांनी विद्यार्थ्यांना करून देत सतारीवर सप्तसुरांची निर्मिती कशी होते, हेही स्पष्ट केले. अहिरभैरव, यमन हे राग विद्यार्थ्यांना वाजवून दाखविले. 
विद्यार्थीदशेत इयत्ता आठवीत असताना प्रथमतः आपण सतारवादन ऐकलं आणि तेव्हापासून आपणही सतार शिकावी असा मनोदय केला. सतार शिकण्यासाठी आवश्यक वेळ मिळावा म्हणून बारावी नंतर पुण्याच्या बी. जे. मेडिकल कॉलेजला प्रवेश मिळत असतानाही कला शाखेत पदवीसाठी प्रवेश घेतला असेही ते म्हणाले.
सतार वादनाचे शिक्षण आपले गुरु उस्ताद उस्मान खान, उस्ताद शहीद परवेज तसेच गानसरस्वती पद्मविभूषण किशोरी आमोणकर यांच्याकडून घेतानाचे अनुभवही महाजन यांनी सांगितले. विद्यार्थ्यांनी विचारलेल्या प्रश्नांना महाजन यांनी समर्पक उत्तरे दिली. विद्यार्थ्यांनी आग्रहाने त्यांना राग कफी व भैरवी वाजून दाखविण्यास सांगितले. विद्यार्थ्यांची ही फर्माईश देखील त्यांनी पूर्ण केली.
याप्रसंगी शैक्षणिक संकुलाचे अध्यक्ष देशमुख म्हणाले की, भारतीय शास्त्रीय संगीत म्हणजे एक सत्संगच असतो. मानवाच्या तरल भावनांना स्पर्श करून आध्यात्मिक अनुभव संगीतामुळे आपल्याला मिळतो. संगीत सर्व प्राणीमात्रांना आनंद देणारे आहे. खोपोली येथील आश्रमामध्ये कार्यक्रमाचे निमंत्रणही महाजन यांना दिले. परिचय प्राचार्य डांगे यांनी करून दिला. आभार प्रा. किशोर बांगर यांनी मानले.
