महाराष्ट्र संवाद न्यूज
आठवडाभरात दुसऱ्यांदा नगरच्या स्थानिक गुन्हे शाखेच्या पोलिसांनी कोल्हारमध्ये बेकायदेशीर विक्रीसाठी आणलेले तीन गावठी कट्टे आणि जिवंत काडतुसांसह पाच जणांना अटक केली आहे. आठवडाभरातील सततच्या दोन घटनांमुळे कोल्हार बुद्रुक गावठी कट्टे विक्रीचे शहर बनत चालले आहे, शहरातील गुन्हेगारी पार्श्वभूमीने परिसरात खळबळ उडाली आहे.
गेल्या आठवड्यात स्थानिक गुन्हे शाखेच्या पथकाने कोल्हार मध्ये तीन गावठी कट्टे आणि सहा जिवंत काडतुसांसह दोन जणांना अटक केली होती. कोल्हार येथे काही लोक गावठी कट्ट्यांची विक्री करण्यासाठी येणार असल्याची माहिती स्थानिक गुन्हे शाखेच्या पथकाला मिळाली होती. पोलीस निरीक्षक अनिल कटके यांच्या मार्गदर्शनाखाली आठवडाभरातच दुसऱ्यांदा स्थानिक गुन्हे शाखेच्या पोलिसांनी पुन्हा एकदा कारवाई करत पाच जणांना अटक केली आहे.
सहाय्यक फौजदार मनोहर शेजवळ, पोलीस कर्मचारी भाऊसाहेब काळे, विजयकुमार विटेकर, संदीप घोडके, देवेंद्र शेलार, शंकर चौधरी, संदीप चव्हाण, लक्ष्मण खोकले, दिलीप शिंदे, राहुल सोळुंके, रणजीत जाधव, संभाजी कोतकर, भरत बुधवंत यांच्या पथकाने ही कारवाई केली.
पथकाने शुक्रवारी दुपारी कोल्हार मधील गौतम नगर भागात पोलिसांनी गावठी कट्ट्याची विक्री करण्यासाठी आलेल्यांना पकडण्यासाठी लावलेल्या सापळ्यात संगमनेर तालुक्यातील शिबलापुर येथील सदानंद राजेंद्र मंतोडे, कोल्हारमधील प्रसन्न विलास लोखंडे, अशपाक उर्फ मुन्ना रफिक पटेल, श्रीरामपूर मधील दुर्गेश बापू शिंदे व हारून उर्फ राजू रशीद शेख या पाच जणांना पकडले. त्यांची अंगझडती घेतली असता पोलिसांना तीन गावठी बनावटीचे कट्टे आणि तीन जिवंत काडतूस आढळून आले. पथकाने या कारवाईत सुमारे ९२ हजार रुपयांचा मुद्देमाल आरोपींकडून हस्तगत केला.
आरोपीं विरोधात लोणी पोलीस ठाण्यात गुन्हे शाखेचे पोलीस नाईक संदीप चव्हाण यांनी दिलेल्या फिर्यादीवरून गुन्हा दाखल करण्यात आला आहे. पोलिसांनी पकडलेल्या आरोपींमध्ये काही जणांविरोधात गंभीर गुन्हे दाखल असल्याची माहिती पुढे येत आहे.
