महाराष्ट्र संवाद न्यूज
दोन महिन्याच्या कालावधीतच राज्याच्या आरोग्य आयुक्त पदावरून तुकाराम मुंढे यांची अनपेक्षितरित्या बदली करण्यात आली. बदलीनंतर त्यांना अद्यापही नव्या नियुक्तीचे ठिकाण देण्यात आलेले नाही. मुंढे यांनी अल्पशा काळातच आरोग्य व्यवस्था सुधारण्यासाठी पाऊले टाकली. राज्याच्या जनतेच्या माफक आणि सुदृढ आरोग्यासाठी मुंढे यांची पुन्हा त्याच पदावर नियुक्ती करण्यात यावी, या मागणीसाठी ज्येष्ठ समाजसेवक अण्णा हजारे प्रणित भ्रष्टाचार विरोधी जन आंदोलनाच्या पदाधिकाऱ्यांनी प्रांताधिकारी कार्यालयाबाहेर सोमवारी घंटानाद आंदोलन केले आहे.
राज्यात सत्तांतर झाल्यानंतर मुख्यमंत्री एकनाथ शिंदे यांनी तुकाराम मुंढे यांना आरोग्य खात्यात आयुक्तपदाची जबाबदारी दिली. मात्र अवघ्या दोन महिन्यातच त्यांची पुन्हा तेथून बदली करण्यात आली. तसेच नवीन नियुक्ती अद्याप देण्यात आली नाही. मुंडे यांना पुनर्नियुक्ती द्यावी, या मागणीसाठी हे घंटानाद आंदोलन केले.
राज्यातील आरोग्य यंत्रणा सुधारण्यासाठी या खात्यात मुंढे यांची अत्यंत गरज आहे. धडाकेबाज कामासाठी प्रसिद्ध असलेल्या तुकाराम मुंढे यांनी आरोग्य सेवा आयुक्त तथा कुटुंब कल्याण मंडळाच्या संचालक पदाचा कार्यभार हाती घेताच दोन महिन्याच्या कालावधीत आरोग्य खात्यात मोठे फेरबदल घडवून आणले.
त्यांनी मुख्यालयी न राहणाऱ्या वैद्यकीय अधिकाऱ्यांना नोटीस बजावली, गरिबांना मिळणाऱ्या सुविधा अधिक दर्जेदार करण्याचे आदेश दिले. सरकारी दवाखान्याचा कायापालट करण्याचा आणि राज्यातील जनतेच्या सुदृढ आरोग्यासाठी त्यांनी काम सुरू केले होते. सरकारी दवाखान्यात डॉक्टरची उपस्थिती वाढविणे, मोफत सुविधा देणाऱ्या ओपीडीचे तास वाढविणे, वरिष्ठ डॉक्टरांनी रात्रीचे राहून तास वाढविणे, सरकारी रुग्णालयातून रुग्णाला खाजगी रुग्णालयात जाण्याचा सल्ला देण्यावर बंदी, सरकारी रुग्णालयात मोफत सुविधा मिळत असताना रुग्णाला खाजगी रुग्णालयात पाठवून आर्थिक लूट थांबविण्यासाठी त्यांनी उचललेली पाऊले यामुळे सर्वसामान्य रुग्णांच्या आणि त्यांच्या नातेवाईकांच्या मनात मुंढे यांच्याविषयी आपुलकी निर्माण झाली.
सोळा वर्षाच्या कार्यकालात मुंढे यांच्या आतापर्यंत एकोणवीस वेळा बदल्या करण्यात आल्या. मुंढे यांच्या ज्या-ज्या ठिकाणी बदल्या झाल्या त्या-त्या ठिकाणी त्यांनी आपल्या कामाचा अल्पावधीतच ठसा उमटविला आहे. गरिबांसाठी आरोग्यदायी असलेल्या सरकारी रुग्णालयाचा कारभार त्यांच्या कार्यकाळात सुधारू लागल्याने वंचित, दुर्बल व गरीब घटकातील रुग्णांना आशेचा किरण दिसत होता.
त्यामुळे राज्य शासनाने कोणत्याही दबावाला बळी न पडता मुंढे यांची पुन्हा आरोग्य आयुक्त पदावर नियुक्ती करण्याची मागणी करण्यात आली आहे. या मागणीसाठी सुरू केलेल्या घंटानात आंदोलनामध्ये अण्णा हजारे प्रणित भ्रष्टाचार विरोधी जन आंदोलनाचे शहर अध्यक्ष सचिन साळुंखे, तालुकाध्यक्ष संजय देशमुख, उपाध्यक्ष आप्पा गुंजाळ, तालुका सचिव असिफ शेख, तालुका सहसचिव अनिल खर्डे, संतोष जेधे, महिला आघाडीच्या फर्जना शेख, दीपक साळुंखे, दत्ता चव्हाण आदींसह संघटनेचे पदाधिकारी, कार्यकर्ते सहभागी झाले होते.
