महाराष्ट्र संवाद न्यूज
राष्ट्रीय पातळीवरील योगासन स्पर्धेच्या तिसऱ्या राष्ट्रीय स्पर्धेचे यजमानपद भूषविण्याची संधी संगमनेरला मिळाली आहे. २६ ते ३० डिसेंबर दरम्यान होणाऱ्या या स्पर्धेत देशातील तीस राज्यांमधून एक हजारावर अधिक स्पर्धक, त्यांचे प्रशिक्षक व राष्ट्रीय योगासन स्पोर्टस फेडरेशनचे पदाधिकारी उपस्थित राहणार आहेत. संगमनेरला पहिल्यांदाच राष्ट्रीय पातळीवरील स्पर्धेच्या आयोजनाचा मान मिळाला असून या माध्यमातून संगमनेरच्या शिरपेचात मानाचा तुरा रोवला जाणार असल्याची माहिती राष्ट्रीय योगासन स्पोर्टस फेडरेशनचे उपाध्यक्ष डॉक्टर संजय मालपाणी यांनी दिली.
मालपाणी म्हणाले, जिल्हा व राज्य पातळीवरील योगासन स्पर्धेच्या यशस्वी आयोजनानंतर आता संगमनेरमध्ये राष्ट्रीय पातळीवरील स्पर्धा ध्रुव ग्लोबल स्कूलच्या क्रीडा संकुलात पार पडत आहेत. 
या राष्ट्रीय पातळीवरील स्पर्धेमुळे योगासन स्पर्धेचे क्रीडा संकुल आणि संगमनेर योगा खेळाडूंमुळे गजबजून जाणार आहे.
केंद्र सरकारने भारतीय प्राचीन परंपरेतील योगासनास खेळाचा दर्जा दिल्यानंतर त्याच्या प्रचार-प्रसार, योगासनाच्या स्पर्धांसाठी आवश्यक असलेला अभ्यासक्रम, योगासनांची निवड, निष्णात पंचांचे प्रशिक्षण आणि वेगवेगळ्या स्पर्धांच्या आयोजनामध्ये संगमनेरचे मोठे योगदान राहिले आहे. तसेच यापूर्वी योगासनांच्या राज्य आणि जिल्हास्तरीय स्पर्धाही संगमनेरमध्ये आयोजित करण्यात आल्या होत्या. यामुळे स्पर्धा आयोजनाचा एक वेगळा ‘संगमनेर पॅटर्न’ विकसित झाला आहे. 
राष्ट्रीय योगासन फेडरेशनचे अध्यक्ष उदित सेठ, सेक्रेटरी जनरल जयदीप आर्य यांच्या माध्यमातून आता राष्ट्रीय पातळीवरील तिसऱ्या स्पर्धेचे यजमानपद संगमनेरला मिळाले आहे.
स्पर्धेच्या निमित्ताने योगा खेळाडूंसह जवळपास बाराशेहुन अधिक जणांची उपस्थिती राहणार असल्याने या सर्वांच्या निवासासह भोजन व स्पर्धा सरावाचीही व्यवस्था करण्यात आली आहे. याशिवाय वेगवेगळ्या समित्या त्यासाठी कार्यान्वित करण्यात आल्या आहेत. महाराष्ट्र योगासन स्पोर्ट असोसिएशनचे अध्यक्ष भालचंद्र पाडळकर, तांत्रिक संचालक रचित कौशिक व व्यवस्थापकीय संचालक डॉ. निरंजन मूर्ती या पदाधिकाऱ्यांचे राष्ट्रीय राज्य पातळीवरील अनेक जण स्पर्धेसाठी संगमनेरात उपस्थित राहणार असल्याचे मालपाणी म्हणाले.
राष्ट्रीय पातळीवर खेळविली जाणारी ही स्पर्धा योगासनांच्या वेगवेगळ्या चार प्रकारांमध्ये होणार आहे. त्यात पारंपारिक व कलात्मक प्रकारामध्ये एकेरी व दुहेरी तालात्मक प्रकारामध्ये दुहेरी आणि कलात्मक प्रकारांमध्ये सांघिक सादरीकरण होणार आहे.
