महाराष्ट्र संवाद न्यूज नेटवर्क
संगमनेर : भारतीय क्रिकेट नियामक मंडळांतर्गत मुलींच्या पंधरा वर्षाखालील महाराष्ट्र क्रिकेट संघात मूळची देवकौठेची असलेली सुहानी भारत कहांडळ हिची उपकर्णधारपदी निवड झाली असून रांची व जयपूर येथे खेळल्या जाणाऱ्या नॅशनल लिगमध्ये ती महाराष्ट्र संघाचे प्रतिनिधित्व करणार आहे.
भारत नवनाथ कहांडळ हे पुणे येथे आयटी कंपनीमध्ये नोकरी करत आहेत. त्यांची सुहानी कन्या आहे. लहानपणापासून सुहानीला क्रिकेटची आवड होती. तिच्यातील कलागुण हेरून भारत कहांडळ व चुलते माजी मंत्री आमदार बाळासाहेब थोरात यांचे जनसंपर्क अधिकारी नामदेव कहांडळ यांनी तिला क्रिकेटसाठी प्रोत्साहित केले. 
इयत्ता नववीमध्ये शिकणारी सुहानी ही सलामीची आक्रमक फलंदाज असून उजव्या हाताने ऑफ स्पिन गोलंदाजी करते. सुहानी सध्या पिंपरी चिंचवड येथील दिलीप वेंगसरकर क्रिकेट अकादमीत प्रशिक्षण घेत आहे. पुणे जिल्हा क्रिकेट असोसिएशन मार्फत घेण्यात आलेल्या निवड चाचणीत ती पात्र ठरली. तत्पूर्वी अनेक स्थानिक स्पर्धांमध्ये तिने आपल्या कौशल्याची चूक दाखवली आहे. पंधरा वर्षाखालील मुलींच्या महाराष्ट्र क्रिकेट संघात तिच्या निवडीबरोबर तिला उपकर्णधारपदाची जबाबदारी देण्यात आली आहे.
भारतीय संघाचा माजी कसोटी कर्णधार अजिंक्य रहाणे, चिंचोली गुरवची आयपीएल खेळाडू छाया सोनवणे, यांच्या पाठोपाठ देवकौठ्याची सुहानी कहांडळ वयाच्या अवघ्या चौदाव्या वर्षी भारतीय महिला क्रिकेट संघाचे उपकर्णधारपद भूषवत आहे. हे संगमनेर तालुक्यासाठी आनंददायी आहे.
सुहानीच्या निवडीबद्दल काँग्रेस विधिमंडळ पक्ष नेते व माजी मंत्री आमदार बाळासाहेब थोरात, आमदार डॉ. सुधीर तांबे, नगराध्यक्ष दुर्गाताई तांबे, सत्यजित तांबे, रणजीतसिंह देशमुख, कॅन्सरतज्ञ डॉ. जयश्रीताई थोरात, इंद्रजीत थोरात, भारतशेठ मुंगसे, भागवतराव आरोटे, सुभाष सांगळे, एकनाथ मुंगसे, जिल्हा परिषद सदस्य महेंद्र गोडगे, बाबासाहेब ओहोळ, राजेंद्र कहांडळ, जनसंपर्क अधिकारी नामदेव कहांडळ, विश्वनाथ आरोटे, अनिल गाजरे, राजेंद्र मुंगसे, सुरेश मुंगसे, ज्ञानेश्वर मुंगसे काशिनाथ कहांडळ, प्राचार्य हरिभाऊ दिघे आदींसह विविध पदाधिकाऱ्यांनी तिचे अभिनंदन केले आहे.
