महाराष्ट्र संवाद न्यूज नेटवर्क
नागपूर : काँग्रेसचे ज्येष्ठ नेते व माजी मंत्री आमदार बाळासाहेब थोरात सोमवारी सकाळी मॉर्निंग वॉक करत असताना पाय घसरून पडल्याने त्यांच्या डाव्या खांद्याला गंभीर दुखापत झाली आहे. उपचारासाठी विशेष विमानाने नागपूरहून त्यांना मुंबईला आणण्यात येत असल्याची माहिती मिळते.
आज सकाळी नागपूरच्या सेमिनरी हिल येथे मॉर्निंग वॉक करताना पडल्यामुळे माझ्या खांद्याला दुखापत झाली आहे. मी नागपूर येथे प्राथमिक उपचार घेतले आहेत. माझी तब्येत पूर्णपणे बरी असून काळजी करण्याचे कारण नाही. मी पुढील उपचार फॅमिली डॉक्टरच्या सल्ल्याने मुंबईत घेणार आहे.
— Balasaheb Thorat (@bb_thorat) December 26, 2022
सध्या हिवाळी अधिवेशन सुरू असून थोरात अधिवेशनासाठी नागपूरमध्ये आहे. सोमवारी सकाळी ते मॉर्निंग वॉक करत असताना पाय घसरून खाली पडले. यावेळी त्यांच्या हाताला गंभीर दुखापत झाली आहे. त्यांचा हात फ्रॅक्चर झाल्याची माहिती मिळत असून त्यांची तातडीने अधिवेशनासाठी तैनात असलेल्या वैद्यकीय अधिकाऱ्यांनी तपासणी केली.
त्यानंतर त्यांना नागपूरच्या मेयो रुग्णालयात उपचारासाठी दाखल करण्यात आले होते. तेथे थोरात यांची वैद्यकीय तपासणी झाल्यानंतर पुढील उपचारासाठी त्यांना मुंबईला हलविण्याचा निर्णय घेण्यात आला आहे. दुपारी त्यांना मुंबईला हलविण्यात आले आहे.
दरम्यान थोरात यांना दुखापत झाल्याचे समजताच काँग्रेसचे प्रदेशाध्यक्ष नाना पटोले, माजी मंत्री यशोमती ठाकूर प्रणिती शिंदे यांनी रुग्णालयात जाऊन थोरात यांच्या प्रकृतीची माहिती घेतली. काळजी करण्यासाठी काही नसल्याची माहिती यावेळी देण्यात आली.
