महाराष्ट्र संवाद न्यूज नेटवर्क
राज्य शासनाने आधार प्रमाणीकरण करण्यासाठी लाभार्थी शेतकऱ्यांची यादी प्रसिद्ध केली आहे. माजी महसूल मंत्री विधिमंडळ पक्ष नेते आमदार बाळासाहेब थोरात यांच्या प्रयत्नातून दुसऱ्या यादीमध्ये संगमनेर तालुक्यातील ७४१६ शेतकऱ्यांची नावे असून त्यांना प्रत्येकी पन्नास हजार रुपये अनुदान मिळणार असल्याची माहिती थोरात कारखान्याचे संचालक इंद्रजीत थोरात व तालुका विकास अधिकारी अशोक थोरात यांनी दिली आहे.
तत्कालीन मुख्यमंत्री उद्धव ठाकरे, उपमुख्यमंत्री अजित पवार, महसूल मंत्री बाळासाहेब थोरात यांच्या नेतृत्वाखालील महाविकास आघाडी सरकारने राज्यातील शेतकऱ्यांना विनाअट दोन लाख रुपयांपर्यंतची कर्जमाफी दिली होती. तसेच नियमित कर्ज फेड करणाऱ्या शेतकऱ्यांना पन्नास हजार रुपये प्रोत्साहन पर अनुदान देण्याचा निर्णय घेतला होता. राज्याचे तत्कालीन महसूल मंत्री व संगमनेरचे लोकप्रतिनिधी आमदार बाळासाहेब थोरात यांचा या निर्णयांमध्ये मोठा पुढाकार होता. राज्यभरातील अनेक शेतकऱ्यांना या निर्णयाचा मोठा लाभ झाला.
संगमनेर तालुक्यातील शेतकऱ्यांनी सातत्याने नियमितपणे कर्ज भरण्यास प्राधान्य दिले. यावर्षीही कर्ज वसुलीची जिल्हा बँकेची परंपरा जपताना ९९.८०% कर्ज वसुली दिली. त्यामुळे नियमितपणे कर्ज भरणाऱ्या संगमनेर तालुक्यातील शेतकऱ्यांना प्रोत्साहन पर योजनेचा लाभ मिळावा याकरता आमदार बाळासाहेब थोरात यांनी सातत्याने पाठपुरावा केला.
यामुळे दुसऱ्या यादीत तालुक्यातील ७४१६ खात्यांची यादी आधार प्रमाणीकरण करण्यासाठी प्रसिद्ध करण्यात आली आहे. या यादीचे जिल्हा बँक व राष्ट्रीयकृत बँकांमधील आधारे प्रमाणीकरण पूर्ण झाल्यानंतर पात्र ठरलेल्या सर्व शेतकऱ्यांच्या खात्यावर पन्नास हजार रुपयांचे अनुदान जमा होणार आहे.
यामुळे संगमनेर तालुक्यातील नियमित कर्ज भरणाऱ्या शेतकऱ्यांमध्ये मोठे आनंदाचे वातावरण निर्माण झाले असून या सर्व शेतकरी बांधवांनी काँग्रेस विधिमंडळ पक्षनेते आमदार बाळासाहेब थोरात यांचे आभार मानले आहे.
