महाराष्ट्र संवाद न्यूज नेटवर्क
पोलीस ठाण्यामध्ये दाखल असलेल्या तक्रार अर्जावरून तक्रारदाराच्या भावास आरोपी न करण्यासाठी तसेच सदरचा अर्ज दिवाणी बाब म्हणून फाईल करण्यासाठी पोलीस उपनिरीक्षकाने तक्रारदाराकडे तब्बल दोन लाख रुपयांची लाच मागितली. प्रकरण मिटविण्यासाठी दोन लाखावर सेटलमेंट करणाऱ्या या उपनिरीक्षकाला एसीबीने तुरुंगाची हवा दाखविली आहे.
रोहित गणेश डोळस (वय ३१ वर्ष) असे लाचखोर पोलीस उपनिरीक्षकाचे नाव आहे. तो पिंपरी चिंचवड पोलीस आयुक्तालयाच्या अंतर्गत येणाऱ्या पिंपरी पोलीस स्टेशनमध्ये पोलीस उपनिरीक्षक म्हणून कार्यरत आहे. पिंपरी पोलीस ठाण्यात दाखल करण्यात आलेल्या एका तक्रार अर्जासंदर्भात डोळस याने तक्रार अर्ज दिवाणी बाब म्हणून फाईल करण्यासाठी तसेच एसीबीकडे तक्रार करणाऱ्या तक्रारदाराच्या भावास आरोपी न करण्यासाठी दोन लाख रुपयांची लाच मागितली होती. 
मात्र तक्रारदाराने उपनिरीक्षक डोळस याला लाचेची रक्कम न देता पुणे एसीबीकडे तक्रार दाखल केली होती. एसीबीने यासंदर्भात २ डिसेंबरला पडताळणी केली असता पोलीस उपनिरीक्षक रोहित डोळस याने तक्रारदाराकडे दोन लाख रुपये मागितल्याचे स्पष्ट झाले. त्यानंतर शुक्रवारी लाचखोर पोलीस उपनिरीक्षक डोळस याच्या विरोधात पुणे एसीबीने लाच मागणीचा गुन्हा पिंपरी पोलीस ठाण्यात दाखल केला आहे. आरोपी रोहित डोळस याला अटक करण्यात आली असून पुणे एसीबीचे पोलीस निरीक्षक भारत साळुंखे पुढील तपास करत आहेत.
पुणे एसीबीचे पोलिस अधीक्षक अमोल तांबे, अप्पर अधीक्षक सुरज गुरव यांच्या मार्गदर्शनाखाली पोलिस निरीक्षक भारत साळुंखे, संदीप वऱ्हाडे, पोलिस हवालदार मुकुंद अयाचीत, पोलिस कर्मचारी भूषण ठाकूर आणि चालक एएसआय जाधव यांनी केली आहे.
