महाराष्ट्र संवाद न्यूज नेटवर्क
संगमनेर : सरपंचाच्या घरी डल्ला मारत अज्ञात चोरट्यांनी तब्बल १४ लाख रुपयांची केबल चोरून नेल्याचा प्रकार तालुक्यातील निमोण येथे घडला आहे. सोमवारी मध्यरात्री साडेबारा वाजण्याच्या सुमारास हा प्रकार घडला.
निमोणचे विद्यमान सरपंच संदीप भास्कर देशमुख यांनी दिलेल्या फिर्यादीवरून पोलिसांनी अक्षय संजय जाधव (वय २४ वर्षे रा. बालमटाकळी ता. शेवगाव) याच्यासोबत त्याच्या दोघा साथीदारांविरोधात चोरीचा गुन्हा दाखल केला आहे. यातील जाधव याला ग्रामस्थांच्या मदतीने पकडण्यात आले.
देशमुख यांनी दिलेल्या फिर्यादीत म्हटले आहे की, सोमवारी मध्यरात्री सफेद रंगाच्या स्कार्पिओमधून (क्रमांक ८०५५ पूर्ण क्रमांक माहिती नाही) आलेल्या आरोपींनी घरासमोर ठेवलेली १४,१७,४१६/-रुपये किमतीचे पंधराशे मीटर लांबीचा एक पंचवीस स्वेअर्स एम. एम. आरमार्ड काळ्या रंगाचा केबल बंडल चोरून नेला आहे. सोमवारी सकाळी यासंदर्भात संगमनेर तालुका पोलीस ठाण्यात देशमुख यांच्या फिर्यादीवरून आरोपी अक्षय संजय जाधव (वय २४ वर्ष, रा. बालमटाकळी ता. शेवगाव) याचा सह त्याच्या आणखी दोघा साथीदारांविरोधात चोरीचा गुन्हा दाखल करण्यात आला आहे. यातील संदीप जाधव या आरोपीला ग्रामस्थांच्या मदतीने पकडण्यात यश मिळाले असून त्याला पोलिसांच्या ताब्यात देण्यात आले आहे.
दरम्यान घटनेची माहिती मिळताच संगमनेर तालुका पोलीस ठाण्याचे निरीक्षक अरुण आव्हाड, सहाय्यक पोलीस निरीक्षक सुजित ठाकरे, पोलीस उपनिरीक्षक विजय खंडीझोड सहाय्यक फौजदार आर. ए. पठाण यांनी तातडीने घटनास्थळी भेट देत माहिती घेतली. पुढील तपास पोलीस उपनिरीक्षक विजय खंडीझोड हे करत आहे.
घटना चोरीची चर्चा दरोड्याची…
चोऱ्या, खून, दरोडे संगमनेरमध्ये सातत्याने घडत आहे. यातील आरोपी शोधण्यास पोलीस यंत्रणेला अपयश येत असल्याने शहरासह तालुक्यात कायदा सुव्यवस्थेचा प्रश्न निर्माण झाला आहे. यातच पोलीस यंत्रणेकडून माध्यमाने माहिती दिली जात नसल्याने समाजामध्ये चुकीच्या पद्धतीने माहिती प्रसारित होत असताना दिसते. निमोणच्या घटनेबाबतही अशाच प्रकारे दरोडा पडल्याचे वृत्त समाज माध्यमाद्वारे सर्वत्र पोहोचल्याने नेमका प्रकार काय आहे याबाबत चर्चा सुरू होत्या.
