महाराष्ट्र संवाद न्यूज नेटवर्क
आपसातील जागेचे वाद आणि सलूनचे दुकान तोडल्याच्या कारणावरून दोन कुटुंबीयांमध्ये मंगळवारी सकाळी जोरदार वाद झाले. पोलीस ठाण्यापर्यंत पोहोचलेल्या या वादामध्ये दोन्ही कुटुंबीयातील बावीस जणांविरोधात विविध कलमानुसार गुन्हा दाखल करण्यात आला आहे.
संगमनेर तालुक्यातील खांडगाव येथे हा प्रकार घडला. यासंदर्भात दोन्ही गटांनी परस्पर विरोधी तक्रारी पोलीस ठाण्यात दाखल केल्या आहेत. राजेंद्र यादव सस्कर यांनी दिलेल्या फिर्यादीत म्हटले आहे की, ते गावी गेलेले असताना जनार्दन गोविंद गुंजाळ, संदीप चंद्रभान गुंजाळ, दत्तू तुकाराम गुंजाळ, विलास तुकाराम गुंजाळ, भानुदास देवराम गुंजाळ, बादशहा गोविंद गुंजाळ, बाबासाहेब गोविंद गुंजाळ, सचिन बादशहा गुंजाळ, अमोल भानुदास गुंजाळ, संकेत बाबासाहेब गुंजाळ, शुभम बाबासाहेब गुंजाळ, नितीन सूर्यभान गुंजाळ, अजित बाबासाहेब गुंजाळ, महेश नामदेव गुंजाळ, अमित बाबासाहेब गुंजाळ यांच्यासह इतर चार ते पाच महिलांनी गैर कायद्याची मंडळी गोळा करत फिर्यादीच्या घराशेजारील मातीचे बांधकाम केलेले व वरून पत्रा असलेले हेअर सलून दुकान तोडून नुकसान केले. तसेच घरासमोरील बदामाचे झाड तोडत त्याचे नुकसान केले. याशिवाय संडास, बाथरूम आणि नळ कनेक्शनचेही तोडून नुकसान केले. याशिवाय शिवीगाळ करत हातपाय तोडून टाकण्याची धमकी दिली असल्याचे तक्रारीत म्हटले आहे. या तक्रारीवरून संबंधितांविरोधात गुन्हा दाखल करण्यात आला असून पुढील तपास पोलीस नाईक पवार करत आहे.
याच अनुषंगाने दुसरी परस्परविरोधी फिर्याद जनार्दन गोविंद गुंजाळ यांनी राजेंद्र यादव सस्कर, संजय यादव सस्कर, सुधाकर यादव सस्कर, प्रसाद संजय सस्कर, पुष्पा कमलाकर सस्कर, सुषमा राजेंद्र सस्कर व सुधाकर यादव सस्कर यांचा मुलगा (नाव माहीत नाही) यांच्या विरोधात दिलेल्या फिर्यादीवरून गुन्हा दाखल करण्यात आला आहे. जनार्दन गुंजाळ यांनी आपल्या फिर्यादीत म्हटले आहे की, गैर कायद्याची मंडळी गोळा करुन आलेल्या आरोपींनी गुंजाळ यांची भावजई ज्योती संजय गुंजाळ व इतर सूना यांना म्हणाले की, ही जागा आमची आहे. येथे काही करायचे नाही असे म्हणत फिर्यादी, फिर्यादीची भावजई आणि सुनांना शिवीगाळ करुन तुमच्याकडे पाहतो असा दम दिला. या तक्रारीवरून देखील पोलिसांनी संबंधित आरोपी विरोधात गुन्हा दाखल केला असून पुढील तपास पोलीस नाईक धादवड हे करत आहे.
