महाराष्ट्र संवाद न्यूज नेटवर्क
अकोले : दोन अल्पवयीन मुलींना पळवून नेल्याचा प्रकार अकोले तालुक्यात समोर आला आहे. यासंदर्भात अज्ञात व्यक्तीविरोधात अकोले आणि राजुर पोलीस ठाण्यात दोन वेगवेगळे गुन्हे दाखल करण्यात आले असून पोलीस या गायब झालेल्या मुलींचा शोध घेत आहेत.
अकोले पोलीस ठाण्याच्या हद्दीत असलेल्या एका कापड दुकानात काम करणारी अल्पवयीन मुलगी अनपेक्षितरित्या गायब झाली आहे. तर राजुर पोलीस ठाण्याच्या हद्दीत गावातील मंदिरामध्ये हरिपाठासाठी गेलेली अल्पवयीन मुलगी गायब झाल्याची तक्रार पोलीस दप्तरी नोंद करण्यात आली आहे. दोन दिवसात तालुक्यातून दोन अल्पवयीन मुली गायब झाल्याने व त्यांना अज्ञात व्यक्तीने पळविले असल्याचा संशय तक्रारदाराने व्यक्त केल्यामुळे अकोले तालुक्यात खळबळ उडाली आहे. या दोन्ही अल्पवयीन मुलींचा शोध घेण्याचे आव्हान अकोले आणि राजुर पोलिसांसमोर उभे ठाकले आहे.
राजुर पोलीस ठाण्याच्या हद्दीत असलेल्या गावामधील एक मुलगी ३१ डिसेंबर रोजी रात्री ८ वाजण्याच्या सुमारास विठ्ठल रुक्मिणीच्या मंदिरात सप्ताहाच्या कार्यक्रमानिमित्त हरिपाठ करण्यासाठी गेली होती.
हरिपाठ संपल्यानंतर मंदिरातील सर्व लोक घरी पोहोचले. परंतु सदर मुलगी घरी आली नाही. घरच्यांनी तिचा शोध घेतला पण ती मिळून आली नाही. त्यामुळे सदर मुलगी कोणीतरी अज्ञात व्यक्तीने फुस लावून पळवून नेल्याची शंका तिच्या घरच्यांना आली. या संदर्भात मुलीच्या आजीने राजूर पोलीस ठाण्यात फिर्याद दिली असून पोलिसांनी अज्ञात व्यक्तीविरुद्ध अल्पवयीन मुलीला (वय १७ वर्षे ८ महिने) पळवून नेण्याचा गुन्हा दाखल केला आहे.
तर दुसऱ्या घटनेत अकोले शहरातील एका कापड दुकानात कामास असलेल्या मुलीला तिच्या घरच्यांनी सकाळी दुकानात सोडले. मुलगी रात्र झाली तरी घरी आली नाही. म्हणून घरच्या मंडळीनी सदर कापड दुकानात चौकशी केली असता कापड दुकान मालकाने सांगितले की, सदर मुलगी सायंकाळी साडेपाच वाजण्याच्या सुमारास दुकानातून बाहेर गेली आहे.
बेपत्ता झालेल्या या मुलीचा तिच्या नातेवाईकांनी शोध घेतला. परंतु मुलगी आढळून आली नाही.
त्यामुळे सदर मुलीला कोणीतरी पळून नेले असावे, असा तिच्या नातेवाईकांचा संशय आहे. या संदर्भात मुलीच्या आईने अल्पवयीन मुलीस (वय १६ वर्षे १ दिवस) हिला कोणीतरी अज्ञात व्यक्तीने पळवून नेले असावे अशी फिर्याद दिली आहे. पोलीस यासंदर्भात पुढील तपास करत आहेत.
