महाराष्ट्र संवाद न्यूज नेटवर्क
ग्रामपंचायत निवडणुकीच्या कारणावरून सुरू झालेला साकुरमधील वाद नववर्षाच्या सुरुवातीपासूनच उफाळून आलेला असताना आता थेट घरातील व्यक्तीवर हल्ले करून विनयभंग करण्यापर्यंत पोहोचला आहे. या संदर्भात घारगाव पोलीस ठाण्यात विनयभंग, अनुसूचित जाती जमाती अत्याचार प्रतिबंधक कायद्यासह विविध कलमाद्वारे सुमारे १७ जणांविरोधात गुन्हा दाखल करण्यात आला आहे.
सुभाष बाजीराव खेमनर (निवृत्त कृषी अधिकारी), बुवाजी भागा खेमनर, किशोर बाजीराव खेमनर, इसाक अब्दुल पटेल, विश्वजीत सुभाष खेमनर, बबलु ऊर्फ आदिक बाळासाहेब शेंडगे, सद्दाम मन्सुर चौगुले यांच्यासह आणखी दहा जणांचा आरोपींमध्ये समावेश आहे. बुधवारी संध्याकाळी साडेसात वाजण्याच्या सुमारास हा प्रकार घडला असून गुरुवारी दुपारी घारगाव पोलीस ठाण्यात यासंदर्भात गुन्ह्याची नोंद करण्यात आली आहे. अद्याप या प्रकरणी कोणालाही अटक करण्यात आलेली नसल्याची माहिती मिळाली आहे.
घारगाव पोलीस ठाण्यात दाखल करण्यात आलेल्या तक्रारीनुसार, बुधवारी सायंकाळी आरोपींनी गैर कायद्याची मंडळी गोळा करत फिर्यादी आणि तिचे पती तसेच इतर नातेवाईक साकुर गावचे प्रमुख शंकर खेमनर, इंद्रजीत खेमनर यांच्या समर्थनार्थ संगमनेर येथे गेले असल्याचा कारणावरून फिर्यादी आणि तिच्या पतीचा जातीवाचक उल्लेख करत आरोपींनी तुम्ही गावचा कारभार कसा चालवता हे आम्ही पाहतो, तुमचे गावातील संपूर्ण जात नष्ट करून टाकू. अशी जातीवाचक शिवीगाळ करून आरोपींनी फिर्यादीच्या घरात अनाधिकाराने घुसत फिर्यादीस तसेच फिर्यादीचे पतीस व इतर नातेवाईकांना शिवीगाळ, दमदाटी करीत लाथाबुक्यांनी मारहाण केली व घरात असणारी फिर्यादी व इतर बायका यांची साडी ब्लाऊज धरून ते फाडून त्यांना लज्जा उत्पन्न होईल, असे कृत्य करून त्यांना घराबाहेर ओढत आणले व जाताना पुन्हा शंकर खेमनर, इंद्रजीत खेमनर यांच्या मागे दिसलात तर तुमची वस्ती जाळून टाकु अशी धमकी दिली.
यावरून आरोपींविरोधात गुन्हा दाखल करण्यात आला असून पुढील तपास संगमनेर उपविभागाचे पोलीस उपाधीक्षक संजय सातव करत आहेत.
