महाराष्ट्र संवाद न्यूज नेटवर्क
अमरावती : शिंदे फडणवीस सरकार सोबत असलेले प्रहार संघटनेचे नेते माजी मंत्री अपक्ष आमदार बच्चू कडू रस्ता ओलांडत असताना त्यांना एका दुचाकी स्वाराने जोराची धडक दिली आहे. या अपघातात बच्चू कडू गंभीर जखमी झाले असून त्यांच्यावर अमरावतीतील रुग्णालयात उपचार सुरू आहेत.
कडू यांच्यावर अमरावतीतील एका खासगी रुग्णालयात उपचार सुरू असून त्यांनी स्वतः ट्विट झाले या अपघाताची माहिती दिली आहे. मागील काही दिवसांपासून राज्यातील आमदारांच्या अपघाताची मालिकाच सुरु असल्याचं पाहायला मिळत आहे. आमदार जयकुमार गोरे, आमदार धनंजय मुंडे, आमदार योगेश कदम यांच्या कारचा अपघात झाल्याचे प्रकार गेल्या काही दिवसात समोर आले आहे. त्यातच आता प्रहार संघटनेचे नेते, माजी मंत्री बच्चू कडू यांचा अपघात झाला असल्याचे वृत्त समोर आल्याने रस्त्यांवरील अपघाताबद्दल चिंता व्यक्त केली जात आहे.
बुधवारी सकाळी सहा ते साडेसहाच्या दरम्यान आमदार कडू नेहमीप्रमाणे घराबाहेर निघाले होते. अमरावती शहरातील कठोरा रोड परिसरात ते पायी चालत होते. रस्ता ओलांडत असताना एका दुचाकी स्वाराने त्यांना जोराची धडक दिली. दुचाकीच्या धडकेत बच्चू कडू गंभीर जखमी झाले आहेत. त्यांच्या डोक्याला, हाताला आणि पायाला दुखापत झाली आहे.
अमरावतीतील एका खाजगी रुग्णालयात त्यांच्यावर उपचार सुरु आहे. त्यांच्या डोक्याला चार टाके पडले असल्याची माहिती डॉक्टरांनी दिली आहे.
आपल्या ट्विटद्वारे कडू नेमके काय म्हणाले
आज सकाळी रस्ता क्रॉस करताना माझा अपघात झाला. माझी प्रकृती ठीक असुन डॉक्टरांच्या सल्ल्यानुसार मला विश्रांतीची गरज आहे. कृपया सर्व हितचिंतकांना विनंती की कोणीही भेटायला येऊ नये.
— BACCHU KADU (@RealBacchuKadu) January 11, 2023
