महाराष्ट्र संवाद न्यूज नेटवर्क
संगमनेर : घराच्या पोर्चमधून चार वर्षाच्या चिमुकल्याला आपल्या जबड्यात पकडत ओढून नेणाऱ्या बिबट्याच्या तावडीतून आपल्या जीवावर उदार होत आईने या चिमुकल्याची सुटका केली. समोर साक्षात बिबट्या असताना मातेने चिमुकल्याला मृत्यूच्या दाढेतून परत आणले.
संगमनेर शहरालगतचा गुंजाळवाडी मधील देशमुख नगरमध्ये शनिवारी सायंकाळी हा प्रकार घडला. जखमी असलेल्या चिमुकल्यावर रुग्णालयात उपचार सुरू आहे. गेल्या काही दिवसांपासून संगमनेर तालुक्यात बिबट्यांचा वावर वाढला आहे. लोकवस्तीत आलेले हे बिबटे आता माणसांवर देखील हल्ले करत आहेत. त्यामुळे माणसांवर हल्ले करणारे बिबटे पकडण्याचे आव्हान वनविभागासमोर आहे.
देशमुख नगरमध्ये सिमेंट पोल फॅक्टरी जवळ असलेल्या कृष्णाई बिल्डिंगच्या पाठीमागील भागात मोठ्या प्रमाणात बाभळीची झाडे वाढले आहेत. त्यामुळे बिबट्यांना दडून बसण्यास येथे छोटेसे जंगल निर्माण झाले आहे. या लगतच मोठ्या प्रमाणात रहिवासी वस्ती आहे. येथे राहणाऱ्या संभाजी पवार त्यांच्या घराजवळील पोर्चमध्ये खेळणाऱ्या चार वर्षे वयाच्या शिवमवर बिबट्याने अचानक हल्ला केला. त्याची मान आपल्या जबड्यात पकडून बिबट्याने त्याला समोरच्या मोकळ्या मैदानात आणले. यावेळी तेथे जवळच बसलेल्या शिवमच्या आजी आणि चुलतीचा निदर्शनास ही बाब आली. त्यांनी केलेल्या आरडाओरडीमुळे चिमुकल्याची आई बिबट्याच्या पाठीमागे धाऊ लागली.
तिने जीवावर उदार होत बिबट्याच्या तावडीतून आपल्या मुलाला सोडविले. बिबट्याने केलेल्या हल्ल्यात या चिमुकल्याच्या हनुवटी जवळ, पंजामुळे छातीला मोठ्या प्रमाणात जखमा झाल्या आहेत. चिमुकल्याला तातडीने खाजगी रुग्णालयात व तेथून घुलेवाडी येथील ग्रामीण रुग्णालयात उपचारासाठी दाखल करण्यात आले. जखमी शुभमच्या हनुवटीला सात ते आठ टाके पडले आहेत.
दरम्यान घटनास्थळी वनक्षेत्रपाल सागर माळी यांच्या मार्गदर्शनाखाली दाखल झालेल्या वनविभागाच्या पथकाने शोध घेतला असता त्यांना झुडूपात लपलेला बिबट्या दिसला मात्र, संतप्त झालेल्या परिसरातील नागरिकांनी झुडपामध्ये जेसीबी घातल्याने बिबट्याने तेथून पळ काढला. रात्री उशिरापर्यंत वनविभागाच्या पथकाने बिबट्याच्या शोधार्थ परिसर पिंजून काढला. मात्र बिबट्या दिसून पसार झाला होता. बिबट्याने चिमुकल्यावर केलेल्या या हल्ल्यामुळे गुंजाळवाडी परिसरात भीतीचे वातावरण निर्माण झाले आहे.
