महाराष्ट्र संवाद न्यूज नेटवर्क
संगमनेर : ह्यूमन राईटचा पदाधिकारी व पुरोगामी पत्रकार संघाचा सदस्य असल्याचे सांगत महिलेकडे सहा लाख रुपयांची खंडणी मागणाऱ्या शौकत पठाण याच्या विरोधात शहर पोलीस ठाण्यात खंडणीचा गुन्हा दाखल करण्यात आला आहे.
या संबंधात शहरातील एकता चौकात राहणाऱ्या संबंधित महिलेने दिलेल्या तक्रारीनुसार आरोपी पठाण याने १८ डिसेंबरच्या रात्री महिलेला फोन करून तुमच्याबद्दल माझ्याकडे लेखी तक्रार आली आहे, तुम्ही लोकांना त्रास देतात. त्याबाबत माझ्याकडे ऑडिओ व्हिडिओ रेकॉर्डिंग आणि तुमचे अश्लील फोटो माझ्याकडे आले आहेत. मला अर्जंट भेटा असे सांगत फोन कट केला. या संदर्भात संबंधित महिलेने अधिक माहिती घेतली असता, शौकत पठाण व त्याला मदत करणारी मोसिन मणियार, बानो शेख, इजाज शेख व सविता भालेराव हे लोकांना खोट्या बातम्या देवुन भिती दाखवुन पैशांची खंडणी मागतात.
त्यानंतर दुसऱ्या दिवशी या महिलेने पठाण याला फोन केला असता त्याने तिला कुरण रोड येथे भेटण्यास बोलविले. संबंधित महिलेने करण रोड येथे जात पठाण याची भेट घेतली असता त्याने ह्यूमन राईट कमिशनचा पदाधिकारी व पत्रकार असल्याचे सांगत या महिले संदर्भात आलेल्या तक्रारीच्या आधारे तिच्या विरोधात गुन्हा दाखल करण्याची धमकी दिली. महिलेने तिच्या विरोधातील तक्रार अर्जाची मागणी केली असता कोणताही अर्ज न दाखविला त्याने हे प्रकरण मिटविण्यासाठी तिच्याकडे सहा लाख रुपयांच्या खंडणीची मागणी केली असल्याचे तक्रारीमध्ये म्हटले आहे.
या आधारे पठाण यांच्या विरोधामध्ये शहर पोलीस ठाण्यात खंडणीचा गुन्हा दाखल करण्यात आला आहे. दरम्यान या प्रकारामुळे शहरात खळबळ उडाली असून पोलीस पुढील तपास करत आहेत.
