महाराष्ट्र संवाद न्यूज नेटवर्क
संगमनेर : शहरानजीकच्या वडगाव पान येथील एका लॉजवरील वेश्या व्यवसायावर श्रीरामपूरच्या पोलीस उपाधीक्षकांनी सोमवारी रात्री नऊ वाजण्याच्या सुमारास छापा टाकला. कारवाई पोलिसांना येथे वेश्या व्यवसाय सुरू असल्याचे आढळून आले. या प्रकारामुळे संगमनेरमध्ये सर्रासपणे लॉजवर वेश्या व्यवसाय सुरू असल्याचे समोर आले आहे.
याप्रकरणी तिघांवर अनैतिक व्यापारास प्रतिबंधक कायदा 1956 चे कलम 3, 4, 5, 7, 8 प्रमाणे गुन्हा दाखल करण्यात आला आहे. आरोपीमध्ये एका महिलेचा देखील समावेश आहे.
शहरालगतच्या वडगाव पान शिवारामध्ये वडगाव पान फाटा ते कोपरगाव रोडलगत असलेल्या हॉटेल विशाल गार्डनच्या मागे साईमाया लॉजमधील खोलीत हा व्यवसाय सुरू असल्याची माहिती श्रीरामपूरचे पोलीस उपाधीक्षक संदीप मिटके यांना मिळाली होती. त्यांच्या पथकाने स्थानिक पोलिसांना मदतीला घेत सोमवारी रात्री नऊ वाजण्याच्या दरम्यान संबंधित ठिकाणी बनावट ग्राहक पाठवून खात्री केली असता तेथे वेश्या व्यवसाय सुरू असल्याचे स्पष्ट झाल्यानंतर छापा टाकण्यात आला.
कारवाई दरम्यान येथे काही परप्रांतीय महिला हा व्यवसाय करताना आढळून आल्या असल्याची माहिती मिळते. तसेच बदलापूर (ठाणे) येथील एक महिला व आरोपी या महिलांकडून आर्थिक फायद्यासाठी हा व्यवसाय करून घेत असल्याचे स्पष्ट झाले. कारवाईदरम्यान पोलिसांनी कुंटणखाना चालविण्यासाठी लागणारे साहित्य ताब्यात घेतले आहे. या कारवाईत पोलिसांनी चार मोबाईलसह एक्केचाळीस हजार रुपयांचा मुद्देमाल ताब्यात घेतला आहे.
संगमनेर तालुका पोलीस ठाण्यात सहाय्यक फौजदार विष्णू कान्हु आहेर यांच्या तक्रारीवरून प्रतीक बाळासाहेब चत्तर, खेमराज कृष्णराज उपाध्याय (दोघे रा. वडगाव पान, संगमनेर) यांच्यासह संगमनेरमधील एका महिलेविरोधात अनैतिक व्यापारास प्रतिबंधक कायदा 1956 चे कलम 3, 4, 5, 7, 8 प्रमाणे गुन्हा दाखल करण्यात आला आहे. पुढील तपास सहाय्यक पोलीस निरीक्षक सुजित ठाकरे करत आहेत.
