महाराष्ट्र संवाद न्यूज नेटवर्क
बीड : जिल्ह्यातील केज तहसील कार्यालयात नायब तहसीलदार म्हणून कार्यरत असलेल्या महिला अधिकाऱ्याच्या अंगावर पेट्रोल टाकून त्यांना जाळण्याचा प्रयत्न झाला आहे. हल्ल्यातून बचावलेल्या या महिला अधिकाऱ्यावर रुग्णालयात उपचार सुरू आहेत.
आशा वाघ असे हल्ल्यात जखमी झालेल्या नायब तहसीलदार असलेल्या महिला अधिकाऱ्याचे नाव आहे. संजय गांधी निराधार योजनेचा पदभार त्यांच्याकडे आहे. शुक्रवारी (ता.२०) दुपारी हा धक्कादायक प्रकार घडला आहे. हा हल्ला कोणी आणि कशासाठी केला याचा पोलीस यंत्रणा शोध घेत आहे. पोलिसांनी याप्रकरणी तातडीने तपास सुरू केला आहे.
वाघ घरून जेवण करून आपल्या दुचाकीवरून कार्यालयात जात असताना रस्त्यात आडव्या आलेल्या एका चार चाकी वाहनातून उतरलेल्या एका महिलेसह चार हल्लेखोरांनी त्यांच्यावर हल्ला केला. हल्लेखोरांनी वाघ यांच्या अंगावर बाटलीतून आणलेले पेट्रोल टाकले आणि त्यांना जाळण्याचा प्रयत्न केला. हल्लेखोर माचिस काढून काडी पेटविण्याचा प्रयत्न करत असतानाच त्यांनी तेथून पळ काढल्याने त्या या हल्ल्यातून बचावल्या असून त्यांना उपचारासाठी केज येथील उपजिल्हा रुग्णालयात दाखल करण्यात आले आहे. हल्लेखोर फरार झाले असून पोलीस त्यांचा शोध घेत आहेत.
आधीही झाला होता वाघ यांच्यावर हल्ला
६ जून २०२२ रोजी नायब तहसीलदार आशा वाघ यांच्यावर त्यांच्याच भावाने कौटुंबिक वादातून कोयत्याने जीवघेणा हल्ला केला होता. भाऊ मधुकर वाघ याने त्यांच्या मानेवर आणि डोक्यात वार केले होते. या हल्ल्यात त्या गंभीर जखमी झाल्या होत्या. आज त्यांच्यावर पुन्हा एकदा हल्ला झाल्याने या आल्यामागे कौटुंबिक वाद आहे का हे देखील पोलीस यंत्रणा तपासून पाहत आहे.
