महाराष्ट्र संवाद न्यूज नेटवर्क
संगमनेर : शनिवारी रात्री एक वाजण्याच्या सुमारास उपनगरातील मालपाणी हॉस्पिटल जवळील महाराष्ट्र बँकेचे एटीएम मशीन फोडण्याचा प्रयत्न झाला. एटीएम मशीनवर बसविलेल्या डिजिटल सुरक्षा यंत्रणेमुळे लगेचच चोरीच्या प्रयत्नातील दोघा आरोपीपैकी एक आरोपी घटनास्थळापासून काही अंतरावर पकडण्यात पोलिसांना यश आले. तर दुसऱ्या आरोपीला दुपारी उशिराने ताब्यात घेण्यात आले आहे.
संगमनेरमध्ये गुन्हेगारांनी कायदा व सुव्यवस्थेलाच आव्हान दिले असून चोरी सारख्या घटना दररोज नित्यनेमाने घडत आहे. शहर व तालुक्यामध्ये दुचाकी चोरांनी उच्छाद मांडला असून चोरांचा शोध लावण्यास पोलीस अपयशी ठरत आहेत. सातत्याने घडणाऱ्या चोऱ्यांमुळे पोलीस यंत्रणा अस्तित्वात आहे की नाही असा प्रश्न निर्माण झाला आहे. अशा परिस्थितीत वेळेत माहिती मिळाल्याने आणि पोलिसांनी सतर्कता दाखवल्याने एटीएम मशीन फोडून त्यातील रोकड लंपास करण्यापूर्वीच एक चोरटा पोलिसांच्या हाती लागला आहे.
याबाबत अधिक माहिती अशी, शनिवारी रात्री एक वाजण्याच्या दरम्यान जाणता राजा मैदानाजवळील मालपाणी हॉस्पिटल जवळ असलेले लोक वस्तीतील महाराष्ट्र बँकेचे एटीएम मशीन दोन चोरटे लोखंडी रॉडसारख्या टामीच्या साह्याने त्यातील रोकड लंपास करण्याच्या उद्देशाने फोडत होते.
मात्र बँकेने बसविलेल्या डिजिटल सुरक्षेने एटीएम मशीन फोडले जात असल्याचा संदेश थेट आपल्या हैदराबाद येथील मुख्यालयाला दिला. हैदराबाद येथील अधिकाऱ्यांनी तातडीने ही माहिती अहमदनगर जिल्हा पोलिसांना कळविली. तेथून थेट शहर पोलिसांना संदेश देण्यात आला.
रात्रपाळीच्या ड्युटीवर असलेले ठाणे अंमलदार पोलीस उपनिरीक्षक शिवाजी फटांगरे यांनी तातडीने घटनास्थळी पोलीस पथक पाठविले. पोलिसांची चाहूल लागल्याने दोन्ही आरोपी तेथून पळत असताना पोलिसांनी पाठलाग करत त्यापैकी एकाला पकडले. तर दुसरा पसार होण्यात यशस्वी झाला. मात्र पोलिसांनी घेतलेला आरोपीची चौकशी केल्यानंतर दुसऱ्या आरोपीचा ठाव ठिकाणा पोलिसांना मिळाला. पोलीस पथकाने दुसऱ्या आरोपीलाही उशिराने ताब्यात घेतले आहे.
मंगेश बाळु गांगुर्डे (वय २० वर्षे, रा. चास, ता. अकोले) असे पोलिसांनी पकडलेल्या आरोपीचे नाव असून या संदर्भात महाराष्ट्र बँकेचे व्यवस्थापक अक्षय संजय जवरे यांनी दिलेल्या फिर्यादीवरुन शहर पोलीस ठाण्यात मंगेश बाळु गांगुर्डे याच्यासह त्याच्या अज्ञात साथीदारावर गुन्हा दाखल करण्यात आला असून पुढील तपास पोलीस उपनिरीक्षक निवांत जाधव करत आहे.
