विद्यार्थ्यांना खोटी आश्वासने देणाऱ्या एसटी आगार व्यवस्थापकांच्या कार्यालयाला टाळे ठोकणार

महाराष्ट्र संवाद न्यूज नेटवर्क
संगमनेर : कोरोना साथ रोगामध्ये एसटी महामंडळाने संगमनेर तालुक्यातील ग्रामीण भागात जाणाऱ्या अनेक ठिकाणच्या बस सेवा बंद केल्या आहेत. कोरोनानंतर परिस्थिती पूर्वपदावर आली असली तरी, अद्यापही एसटी महामंडळाने या सेवा पूर्ववत केल्या नाही. त्यामुळे विद्यार्थ्यांचे शैक्षणिक नुकसान होत आहे. वारंवार आंदोलने करूनदेखील दखल घेतली जात नसल्याने आता थेट आगार व्यवस्थापकांच्या कार्यालयाला टाळे ठोकण्याचा इशारा विद्यार्थ्यांच्या छात्रभारती संघटनेने दिला आहे.विद्यार्थ्यांचे शैक्षणिक नुकसान टाळण्यासाठी ग्रामीण भागातील एसटी बस सेवा पुन्हा पूर्ववत सुरू कराव्यात या मागणीसाठी छात्रभारती संघटनेने आगार व्यवस्थापकांना वारंवार निवेदने दिली, आंदोलने केली, सातत्याने संवाद साधण्याचा प्रयत्न केला. मात्र एसटी महामंडळाकडून वारंवार उडवा उडवीची उत्तरे दिली. गेली खोटी आश्वासने दिली गेली.
एसटी सेवा बंद असल्याने विद्यार्थ्यांचे विशेषत: मुलींचे शिक्षण बंद पडण्याच्या मार्गावर आहे. विद्यार्थ्यांना एसटी बसच्या पासचा लाभ घेता येत नाही. विद्यार्थ्यांना मिळेल त्या वाहनाने आपला जीव धोक्यात घालून शिक्षणासाठी प्रवास करावा लागत आहे. यामुळे मुलींच्या सुरक्षिततेचा प्रश्न निर्माण झाला आहे. एसटी बसची सुविधा उपलब्ध नसल्याने विद्यार्थ्यांना शहरांमध्ये राहावे लागत आहे. यामुळे मेस आणि खोली भाड्यासाठी त्यांना हजारो रुपये मोजावे लागत आहे.
पठार भागासह तालुक्यातील अनेक गावांमधील एसटी बस सेवा बंद आहे. राजकीय कार्यक्रम, दिंड्या सहलीसाठी एसटी बसेस गेलेल्या आहेत. त्यामुळे गाड्या उपलब्ध नाहीत, अशी कारणे वारंवार दिली जात आहेत. काही ठिकाणच्या बस फेऱ्या अचानक बंद केल्या जात आहेत. या बस फेऱ्या आणि मुक्कामी बसेस तातडीने सुरू कराव्यात. विद्यार्थ्यांचे शैक्षणिक आर्थिक नुकसान होत असून या नुकसानीस आगार प्रशासन जबाबदार आहे. विद्यार्थ्यांचे शैक्षणिक नुकसान टाळावे यासाठी दोन दिवसात एसटी प्रशासनाने विचार करून निर्णय घ्यावा अन्यथा या मागणीसाठी छात्रभारती संघटनेच्यावतीने संविधानिक मार्गाने आगार व्यवस्थापकांच्या कार्यालयाला टाळे ठोकण्याचा इशारा देण्यात आला आहे.
आगार व्यवस्थापकांना निवेदन देतेवेळी छात्रभारती संघटनेचे राज्य कार्यवाह अनिकेत घुले, राज्य सदस्य गणेश जोंधळे, ओंकार अभंग, सुनील खरात, साहिल खरात, पृथ्वीराज खरात, विशाल जगताप, आवजीनाथ गायकवाड, सिद्धांत धाकतोडे, रूपाली घुले, मनीषा फटांगरे, राणी घुले, अनुष्का घुले आदी उपस्थित होते.