महाराष्ट्र संवाद न्यूज नेटवर्क
राहाता : कोंबड्यांची शिकार करण्यासाठी कोंबड्याच्या जाळीमध्ये शिरलेल्या बिबट्याने कोंबड्यांसोबतच शेतकऱ्यावर हल्ला करण्याचा प्रकार राहाता तालुक्यातील कोऱ्हाळे येथे समोर आला आहे. जखमी शेतकऱ्यावर शिर्डीच्या रुग्णालयात प्राथमिक उपचार करण्यात आले. त्यानंतर पुढील उपचारासाठी अहमदनगरला हलविण्यात आले आहे.
बबन बाजीराव ढगे (वय ६५ वर्ष) असे बिबट्याच्या हल्ल्यात जखमी झालेल्या शेतकऱ्याचे नाव आहे. बुधवारी रात्री ढगे नेहमीप्रमाणे झोपलेले होते. रात्री बारा वाजण्याच्या दरम्यान घराजवळ असलेल्या कोंबड्यांच्या जाळीतील कोंबड्या जास्त आवाज करू लागल्याने त्यांनी कोंबड्यांच्या जाळीकडे धाव घेतली. जाळी जवळ गेल्यानंतर त्यांना कोंबड्यांच्या जाळीमध्ये बिबट्या शिरला असल्याचे निदर्शनास आले. त्यामुळे त्यांनी तातडीने जाळीचा दरवाजा उघडला. मात्र बिबट्याने लगेचच त्यांच्यावर हल्ला करत त्यांचा हात आपल्या जबड्यात पकडला.
ढगे यांचा हात जबड्यात पकडून बिबट्या त्यांना फरफटत घेऊन जात असताना त्यांच्या ओरडण्याच्या आवाजाने मुलगा आणि सून घराबाहेर आले. त्यांनी ढगे यांना बिबट्याच्या तावडीतून सोडविले. त्यानंतर बिबट्याने तेथून पळ काढला. ढगे यांच्या हाताला बिबट्याने चावा घेतल्याने मोठ्या प्रमाणात झालेल्या जखमातून रक्तस्राव झाला आहे. त्यामुळे त्यांच्यावर शिर्डी येथे प्राथमिक उपचार केल्यानंतर पुढील उपचारासाठी त्यांना अहमदनगर येथे पाठविण्यात आले.
ढगे यांच्याकडील जवळपास शंभर कोंबड्याचे नुकसान झाले असून या नुकसानीचा वनविभागाने तातडीने पंचनामा करत ढगे यांना भरपाई देण्याची व बिबट्याचा बंदोबस्त करण्याची मागणी परिसरातील शेतकऱ्यांनी केली आहे.
