पंधरा वर्षाच्या मुलाचे लैंगिक शोषण केल्याप्रकरणी महिलेला नाशिकमधून अटक

महाराष्ट्र संवाद न्यूज नेटवर्क
नाशिकमधून एका 32 वर्षीय महिलेला पोलिसांनी अटक केली आहे. पंधरा वर्षे वयाच्या इयत्ता नववीमध्ये शिकणाऱ्या मुलाचे लैंगिक शोषण केल्याचा आरोप या विवाहित महिलेवर असून तिच्या विरोधात पोक्सो कायद्यानुसार गुन्हा देखील दाखल करण्यात आला आहे.
दारू आणि अश्लील व्हिडिओ पाहण्याचे व्यसन या मुलाला लावत महिलेने त्याचे शोषण केले. तसेच स्वतःचे व मुलाचे काही अश्लील व्हिडिओ देखील तिने बनविले असल्याचे म्हटले आहे. या महिलेने पीडित अल्पवयीन मुलाशी शारीरिक संबंध ठेवले तसेच तो सातत्याने संपर्कात राहावा यासाठी तिने त्याला वीस हजार रुपये किमतीचा एक मोबाईलदेखील घेऊन दिला होता. त्याद्वारे हे दोघे सातत्याने संपर्कात होते.
पीडित अल्पवयीन मुलगा हा कल्याण येथील राहणारा असून या मुलाची आत्या नासिक येथे राहते. त्यामुळे त्याचे आत्याकडे येणे जाणे असल्याने त्याची या महिलेची ओळख झाली होती. संबंधित महिला ही मुलाच्या कुटुंबाच्या देखील ओळखीची असल्याने तिने या ओळखीचा गैरफायदा घेत मुलासोबत ओळख वाढविली. त्याला दारू पिण्याचे व अश्लील व्हिडिओ बघण्याचे व्यसन लावले. तसेच नाशिकला बोलावत त्याच्याशी शारीरिक संबंध प्रस्थापित केले.
या मुलाचे अभ्यासात लक्ष लागत नसल्याने तसेच तो सातत्याने फोनवर बोलत या महिलेशी बोलत असल्याचे पालकांच्या लक्षात आले. त्यामुळे या महिलेचो मुलासोबतची वागणूक पालकांना संशयास्पद वाटल्याने त्यांनी वस्तुस्थिती जाणून घेण्यासाठी त्याच्या शिक्षकांची मदत घेतली. शिक्षकांनी या मुलाला विश्वासात घेऊन चौकशी केल्यानंतर त्याने महिलेसोबत असलेल्या शारीरिक संबंधाची माहिती शिक्षकांना दिली. पालकांना याबाबत माहिती झाल्यावर त्यांनी संबंधित महिलेला या मुलापासून दूर राहण्यास सांगितले होते. मात्र तरी देखील ही महिला विविध कारणाने त्या मुलाशी सातत्याने संपर्क करत त्याला भेटत असायची.
त्यामुळे पीडित मुलाच्या पालकांनी सोमवारी कोळसेवाडी पोलीस ठाण्यात या महिलेविरोधात तक्रार दाखल केली त्यानंतर त्या महिलेला नाशिकमधून अटक करण्यात आली आहे. या महिलेवर बाललैंगिक शोषण कायद्यान्वये गुन्हा दाखल करण्यात आला असून पोलीस पुढील तपास करत आहेत.