मॅडम तुम्ही सुद्धा; दहा हजाराची लाच स्वीकारताना महिला डॉक्टरला एसीबीने पकडले

महाराष्ट्र संवाद न्यूज नेटवर्क
समुदाय आरोग्य अधिकारी म्हणून नोकरीस असलेल्या महिलेकडून ऑगस्ट व सप्टेंबर या दोन महिन्याच्या कामावर आधारित मोबदला व प्रोत्साहन भत्त्यासाठी दहा हजार रुपयांची लाच स्वीकारणाऱ्या महिला डॉक्टरला लाच लुचपत प्रतिबंधक विभागाच्या अधिकाऱ्यांनी पकडत त्यांच्यावर गुन्हा दाखल केला आहे.
अहमदनगर जिल्ह्यातील राहुरी तालुक्यात असलेल्या बारागाव नांदूर येथील प्राथमिक आरोग्य केंद्रात कार्यरत असलेल्या वर्ग २ च्या वैद्यकीय अधिकारी डॉ. वृषाली तुळशीराम सूर्यवंशी या लाचखोर महिला डॉक्टरवर अहमदनगरच्या लाच लुचपत विभागाच्या अधिकाऱ्यांनी कारवाई केली आहे.
डॉ. सूर्यवंशी यांनी समुदाय आरोग्य अधिकारी म्हणून नोकरीस असलेल्या २६ वर्षीय राहुरी येथील महिलेकडे लाचेची मागणी केली होती. ऑगस्ट व सप्टेंबर २०२१ या दोन महिन्याच्या कालावधीतील कामावर आधारित मोबदला व प्रोत्साहन भत्ता व ऑक्टोंबर महिन्याचा प्रोत्साहन भत्ता मिळण्यासाठी तक्रारदार महिलेने डॉ. सूर्यवंशी यांची दोन महिन्यांपूर्वी भेट घेऊन विचारणा केली.
त्यावेळी सूर्यवंशी यांनी या तक्रारदार महिलेस तुला मिळणाऱ्या रकमेच्या निम्मी रक्कम मला द्यावी लागेल, असे सांगितले होते. गेल्या महिन्यात या महिलेने पुन्हा सूर्यवंशी यांची भेट घेतली असता आता काहीतरी रक्कम दे, तरच मी तुझ्या बिला संबंधित पुढील प्रोसेस करेल, असे सांगितले. त्यामुळे या महिलेने नाईलाजाने डॉ. सूर्यवंशी यांना आपल्या जवळील साडेचार हजार रुपये दिले.
तक्रारदार महिलेने ३ फेब्रुवारी पुन्हा सूर्यवंशी यांची भेट घेत बिलासंबंधी चौकशी केली असता निम्म्या रकमेची मागणी करत तडजोडीअंती आणखी दहा हजार रुपयांची मागणी केली. त्यामुळे या महिलेने अहमदनगरच्या लाच लुचपत विभागाशी संपर्क करत तक्रार केली. सोमवारी (६ फेब्रुवारी) पंचांसमक्ष लाच लुचपत विभागाच्या अधिकाऱ्यांनी पडताळणी केल्या असता आरोपी डॉ. सूर्यवंशी यांनी १० हजार रुपये लाचेची मागणी केल्याचे निष्पन्न झाले.
त्यानुसार बुधवारी लाच लुचपत विभागाच्या अधिकाऱ्यांनी बारागाव नांदूर येथील प्राथमिक आरोग्य केंद्रामध्ये सापळा रचला. तक्रारदार महिलेकडून दहा हजार रुपयांची लाच स्वीकारताना डॉ. सूर्यवंशी यांना रंगेहाथ पकडण्यात आले. सूर्यवंशी यांच्या विरोधात राहुरी पोलीस ठाण्यात गुन्हा दाखल करण्याचे काम सुरू होते.
पोलीस उपाधीक्षक हरीश खेडकर, पोलीस अंमलदार रविंद्र निमसे, वैभव पांढरे, बाबासाहेब कराड, महिला पोलीस नाईक संध्या म्हस्के, चालक पोलीस हवालदार हरुन शेख यांनी पोलीस अधीक्षक शर्मिष्ठा वालावलकर-घार्गे, अप्पर पोलीस अधीक्षक नारायण न्हाहळदे, वाचक पोलीस उपाधीक्षक नरेंद्र पवार यांच्या मार्गदर्शनाखाली कारवाई केली आहे.