महाराष्ट्र संवाद न्यूज नेटवर्क
पोलिसांच्या ११२ क्रमांकावरील फोन खणाणला. आणि समोरिल व्यक्तीने पोलीस मदत पाठवा, मी खुन करणार आहे असे सांगितले आणि फोन बंद केला. खुनासारखी गंभीर बाब असल्याने पोलिसांनी तात्काळ दखल घेत घटनास्थळी पोलीस पथक पाठविले. पोलीस घटनास्थळी गेले आणि वेगळीच बाब समोर आली. फोन करणारी व्यक्ती तडीपार इसम निघाल्याने पोलिसांनी तात्काळ त्याला ताब्यात घेतले.
संगमनेर तालुक्यातील आश्वी पोलीस ठाण्याच्या हद्दीत हा प्रकार घडला आहे. रविवारी आश्वी टाऊन बीटचे काम बघणारे पोलीस कॉन्स्टेबल प्रवीण रणधीर यांना ११२ क्रमांकावर रात्री आठ वाजण्याच्या सुमारास एक फोन आला. फोनवर बोलणाऱ्या समोरच्या व्यक्तीने हॅलो म्हणताच पोलीस मदत पाठवा, मी खुन करणार आहे. असे सांगितले. खुनासारखी गंभीर बाब असल्याने पोलीस कर्मचारी रणधीर यांनी तातडीने सरकारी वाहन सोबत घेत चालक पोलीस हेड कॉन्स्टेबल झोडगे यांच्यासह आश्वी खुर्द येथील सबस्टेशन गाठले.
घटनास्थळी जात पोलीसांनी फोन करणाऱ्या व्यक्तीची चौकशी केली असता पोलीसांना तेथे पोलीस ठाण्याच्या हद्दीतील व नगर जिल्ह्यातून तडीपार केलेला सराईत गुन्हेगार रविंद्र पंढरीनाथ इंगळे, रा. आश्वी खुर्द हा आढळून आला. तो संगमनेरकडे जाणाऱ्या रस्त्यावर उभा राहून मोठमोठ्याने आरडाओरडा करत होता. त्याच्याजवळ जात पोलिसांनी फोनबद्दल विचारणा केली असता त्याने होकारार्थी उत्तर दिले.
पोलिसांनी त्याला कॉल का कशासाठी केला, तडीपार असतांना कोणाची परवानगी घेत नगर जिल्ह्यात आलात, अति महत्वाचे काही काम होते का, याची विचारणा इंगळे याच्याकडे केली असता त्याने उडवाउडवीची उत्तरे दिली. त्यामुळे पोलिसांनी त्याला ताब्यात घेतले. त्याला नगर जिल्ह्यातून १८ नोव्हेंबर २०२१ रोजी हद्दपार केले होते. हद्दपारीचा कालावधी संपण्यापूर्वीच तो आदेशाचे उल्लंघन करत तो आढळून आल्याने त्याच्याविरोधात पोलीस कर्मचारी प्रवीण रणधीर यांच्या फिर्यादीवरुन महाराष्ट्र पोलीस कायदा अधिनियमाद्वारे गुन्हा दाखल करण्यात आला.
