महाराष्ट्र संवाद न्यूज नेटवर्क
संगमनेर
अमृतवाहिनी इंजिनिअरिंग कॉलेजमध्ये कॉम्प्युटर सायन्सच्या तिसर्‍या वर्षात शिक्षण घेणार्‍या अकोले येथील मूळ रहिवासी असलेल्या संकेत सुरेश नवले या विद्यार्थ्याच्या रहस्यमय खुनाच्या तपासात पोलिसांना यश आले असून याप्रकरणी दोन आरोपींना अटक करण्यात आली आहे. अटक करण्यात आलेल्या एका आरोपीला १३ फेब्रुवारीपर्यंत तर दुसऱ्या आरोपीला १४ फेब्रुवारीपर्यंत पोलीस कोठडी देण्यात आली असल्याची माहिती पोलीस निरीक्षक राजेंद्र भोसले यांनी दिली असून संकेत नवले याचा खून करण्याचे कारण मात्र सांगण्यास त्यांनी स्पष्टपणे नकार दिला आहे.
तर या प्रकरणी पोलिसांचा अजून एका तिसऱ्या आरोपीवर संशय असल्याची माहिती मिळाली आहे. हा तिसरा आरोपी या खुनामागील मास्टरमाईंड आहे की अन्य कोणी याबाबत अद्याप माहिती समोर आलेली नाही. पोलिसांनी या प्रकरणात नाहक गोवल्याचा आरोप आरोपीच्या नातेवाईकांनी केला आहे. आरोपी अटक करून त्यांना पोलीस कोठडी मिळाली असली तरी पोलीस या प्रकरणी माहिती का दडवत आहे? याबाबत पोलिसांविषयी अविश्वासाचे वातावरण निर्माण झाले आहे.
शाहरुख हसन शेख (वय २२) व सलमान इमाम शेख (वय ३०) अशी अटक केलेल्या आरोपींची नावे असून शाहरुख याला १४ फेब्रुवारी पर्यंत आणि सलमान याला १३ फेब्रुवारीपर्यंत पोलीस कोठडी देण्यात आली आहे.
८ डिसेंबर २०२२ रोजी संकेत सुरेश नवले या विद्यार्थ्याचा मृतदेह संगमनेरातील सुकेवाडी रस्त्यावरील नाटकीनाल्याच्या बाजूला आढळून आला होता. शवविच्छेदनातून त्याचा खून झाल्याचे समोर आल्यानंतर पोलिसांनी तपासाला गती दिली. घटनास्थळावर पोलिसांना कोणत्याच वस्तू हाती न लागल्याने तपासात बऱ्याच अडचणींना तोंड द्यावे लागले.
दरम्यान संकेत नवले यांच्या मारेकऱ्यांना लवकर पकडा या मागणीसाठी अकोल्यात मोर्चादेखील निघला होता. पोलिसांवर सामाजिक दबावदेखील होता. साधारण दोन महिन्यानंतर या खुनाचा उलगडा झाला असून दोन आरोपी अटक करण्यात आले आहेत. मात्र या प्रकरणात तिसरा आरोपी देखील असल्याची माहिती समजली असून हा आरोपी कोण हे मात्र अद्यापपर्यंत समजलेले नाही. एरवी अनेकदा गुन्ह्याच्या तपासानंतर पोलीस पत्रकार परिषदा घेऊन गुन्ह्याची उकल कशी केली याची माहिती देत असतात यावेळी मात्र पोलिसांकडून अधिकृतरित्या कोणतीही माहिती पुढे येत नसल्याने नेमकी वस्तूस्थिती काय हे अद्यापही समोर आलेले नाही.
दोन्ही आरोपींना पोलीस कोठडी देण्यात आली असून संकेत नवले याच्या खुनाचे कारण आम्ही सांगू शकत नाही. खून कसा केला, का केला या घटनेची अधिक माहिती देऊ शकत नाही. यासंदर्भात पोलीस कस्टडी दिली एवढी एकच माहिती अधिकृतरित्या देऊ शकतो बाकी अधिकृत माहिती मी देऊ शकत नाही. असे संगमनेर शहर पोलीस ठाण्याचे पोलीस निरीक्षक राजेंद्र भोसले यांनी सांगितले.
