महाराष्ट्र संवाद न्यूज नेटवर्क
मुख्य विद्युत लाईनच्या विजेच्या तारेला स्पर्श झाल्याने जोराचा धक्का बसल्याने एका 35 वर्षीय तरुणाचा मृत्यू झाल्याची घटना संगमनेर तालुक्यातील साकुर येथे घडली आहे.
मोहन भिवाजी मोरे असे दुर्दैवी मृत्यू झालेल्या तरुणाचे नाव आहे. गुरुवारी दुपारी साडेबारा वाजण्याच्या सुमारास साकुरमधील वनवे नगर येथे हा प्रकार घडला. यासंदर्भात घारगाव पोलीस ठाण्यात आकस्मात मृत्यूची नोंद करण्यात आली आहे.
या संदर्भात अधिक माहिती अशी, जावेद अब्दुल शेख यांच्या घरापासून वीज वितरण कंपनीचे मुख्य प्रवाह असलेले विजेची तार गेलेली आहे. शेख यांच्या घराच्या गच्चीवर मोहन भिवाजी मोरे दुपारी साडेबारा वाजण्याच्या सुमारास काम करत असताना अचानक त्यांचा या तारेला स्पर्श झाला.
त्यामुळे मोरे यांना विजेचा जोरदार धक्का बसला. त्यातच ते खाली रस्त्यावर पडले. विजेचा जोराचा धक्का बसल्याने आणि रस्त्यावर पडल्याने मोरे गंभीर जखमी झाले होते. त्यामुळे त्यांना तातडीने उपचारासाठी रुग्णालयात हलविण्यात आले मात्र उपचारापूर्वीच त्यांचा मृत्यू झाला असल्याचे सांगण्यात आले.
मोरे यांचा मृतदेह शवविच्छेदनासाठी संगमनेरच्या कॉटेज रुग्णालयात आणण्यात आला होता. या घटने संदर्भात सुखदेव भिवाजी मोरे यांनी दिलेल्या माहितीवरून घारगाव पोलीस ठाण्यात अकस्मात मृत्यूची नोंद करण्यात आली असून घारगाव पोलीस ठाण्याचे पोलीस निरीक्षक संतोष खेडकर यांच्या मार्गदर्शनाखाली पोलीस नाईक जी. पी. लोंढे हे अधिक तपास करत आहेत. या घटनेमुळे घारगाव परिसरात दुःखाचे सावट निर्माण झाले.
