महाराष्ट्र संवाद न्यूज नेटवर्क
मुख्यमंत्री एकनाथ शिंदे यांच्या पुत्राच्या म्हणजेच खासदार श्रीकांत शिंदे यांच्या कार्यालयावर दगडफेक करणाऱ्या ठाकरे गटाच्या शिवसैनिकाला तीन जिल्ह्यातून दोन वर्षांसाठी पोलिसांनी तडीपार केले आहे. यामुळे उल्हासनगर मध्ये ठाकरे गटाला धक्का बसला आहे.
सुरेश बाबुराव पाटील असे या शिवसैनिक शाखाप्रमुखाचे नाव आहे. शिंदेंच्या कार्यालयावर दगडफेक करणे या शाखाप्रमुखाला चांगलंच महागात पडल आहे.
मुख्यमंत्री एकनाथ शिंदे यांनी शिवसेनेत बंड केल्यानंतर राज्यात मोठा राजकीय पेच निर्माण झाला होता. बंद करत शिंदे यांनी थेट पक्षप्रमुख उद्धव ठाकरे यांनाच आव्हान देत आपल्या समर्थक आमदारांसह सुरुवातीला सुरत आणि त्यानंतर गुवाहाटी गाठले होते.
त्याच दरम्यान त्यांचे पुत्र आणि शिवसेना पक्षाचे खासदार श्रीकांत शिंदे यांचं उल्हासनगर मधील कार्यालय फोडण्यात आलं होतं. उपलब्ध माहितीनुसार सुरेश बाबुराव पाटील हा उल्हासनगर कॅम्प एक भागातील शिवसेनेचा शाखाप्रमुख आहे. त्याने हे कार्यालय फोडल्याच्या कारणावरून त्यावेळी सुरेश पाटील याच्यासह काही कार्यकर्त्यांवर पोलीस ठाण्यात गुन्हाही दाखल करण्यात आला होता.
पाटील याच्यावर यापूर्वी चार गंभीर स्वरूपाचे गुन्हे दाखल असून 2022 मध्ये तीन गुन्हे त्याच्यावर दाखल झाल्याने पोलिसांनी त्याला ठाणे मुंबई आणि नाशिक या तीन जिल्ह्यातून दोन वर्षांसाठी तडीपार केले असल्याची माहिती उल्हासनगर पोलीस ठाण्याचे वरिष्ठ पोलीस निरीक्षक दिलीप फुलपगारे यांनी दिली आहे.
