महाराष्ट्र संवाद न्यूज नेटवर्क
संगमनेर तालुक्यातील घारगांव पोलीस ठाण्याच्या हद्दीतील साकूर आणि माहुली येथे रविवारी रात्री घडलेल्या दोन घटनांनी पठार भाग हादरला आहे. तीन अज्ञात चोरट्यांच्या टोळीने एका तरुणाला शस्त्राचा धाक दाखवत त्याला मारहाण करुन लुटल्याची घटना घडली तर त्यापाठोपाठ काही वेळातच साकूरमधील एका पेट्रोलपंपावर पेट्रोल भरत कर्मचाऱ्यांना रिव्हाल्व्हर आणि चाकुचा धाक दाखवत पेट्रोल पंप लुटल्याची घटना घडली. पठार भागात असलेल्या स्वतंत्र घारगाव पोलीस ठाण्याच्या कायदा आणि सुव्यवस्थेलाच चोरट्यांनी आव्हान दिल्याचे यातून समोर आले. पेट्रोलपंपावरील घटनेतदेखील एकजण जखमी झाल्याची माहिती मिळते.
पहिल्या घटनेत माहुली येथे तीघा चोरट्यांनी एका लक्ष्मी टायर वर्क्समध्ये असलेल्या अनुदेव शैले या तेवीस तरुणाला रात्री दहा वाजण्याच्या सुमारास चाकुचा आणि रिव्हाल्व्हरचा धाक दाखवत त्याच्याकडील दोन मोबाईल आणि रोकड काढून घेतली. तीघे चोरटे त्याच्याकडील एम.एच.१७ सी.ए.७२०७ या क्रमांकाची गाडी घेऊन जात असतांना चोरट्यांनी त्याच्यावर चाकुने वार करत त्याला जखमी केले.
दुसऱ्या घटनेत चोरट्यांनी साकूरमध्ये रिव्हॉल्व्हरचा धाक दाखवत पेट्रोल पंपावर लुटमार केल्याचे समोर आले आहे. या घटनेतदेखील एक व्यक्ती जखमी झाली. रविवारी रात्री पावणे अकराच्या सुमारास साकुर ते मांडवे रस्त्यालगत असणाऱ्या भगवान पेट्रोल पंप (इंडियन पेट्रोल कंपनीचा पेट्रोल पंप) या ठिकाणी दोन मोटार सायकलवरून आलेल्या तीन अज्ञात व्यक्तींनी ही लुटमार केल्याचे सी.सी.टी.व्ही. कॅमेऱ्यामध्ये कैद झाले आहे. अनोळखी चोरट्यांनी पेट्रोल पंपावरील फिर्यादी कर्मचारी व फिर्यादीचे सहकारी यांना रिव्हॉल्वरचा धाक दाखवून आणि दहशत निर्माण करून त्यांच्याकडील २ लाख ५० हजार ७४७ रुपयांची रोख रक्कम चोरून नेली.
सुनील हरिभाऊ गिरे (वय २८ वर्षे, धंदा नोकरी, रा. गिरेवाडी, हिवरगाव पठार, ता. संगमनेर) यांनी यासंदर्भात फिर्याद दिली आहे. या घटनेत अनुदेव अनंत वाटूशरे (रा. घारगाव, ता. संगमनेर) ही व्यक्ती जखमी झाली असल्याची माहिती पोलिसांकडून मिळाली आहे.
अवघ्या तीन व्यक्तींनी मोटरसायकलवरून येत रिव्हॉल्वरचा धाक दाखवत दोन्ही ठिकाणी लुटमार केली आहे. रात्रीच्यावेळी घडलेल्या या घटनांवेळी संबंधितांच्या मदतीस कोणीही धावून आले नसल्याची माहिती समजली आहे. दोन्ही घटनासंदर्भात घारगांव पोलीस ठाण्यात गुन्हा दाखल करण्यात आला आहे. दरम्यान घटनास्थळी वरिष्ठ पोलीस अधिकाऱ्यांनी भेट दिली असून पुढील तपास सुरु आहे.
