महाराष्ट्र संवाद न्यूज
२० फेब्रुवारीपासून सुरू असलेल्या महाराष्ट्रव्यापी बेमुदत संपाच्या अनुषंगाने साईश्रद्धा अंगणवाडी महिला संघटनेच्यावतीने अंगणवाडी सेविकांच्या विविध मागण्यासंदर्भात अहमदनगरचे पालकमंत्री तथा राज्याचे महसूल मंत्री राधाकृष्ण विखे पाटील यांना निवेदन देण्यात आले आहे.
संघटनेच्या महिला पदाधिकाऱ्यांनी जनता दरबारामध्ये पालकमंत्री विखे पाटील यांची भेट घेत मागण्यांचे निवेदन दिले. अंगणवाडी कर्मचाऱ्यांच्या सुरू असलेल्या संपामध्ये महाराष्ट्र साईश्रद्धा अंगणवाडी महिला संघटनेची संगमनेर येथील संघटना देखील सहभागी झाली आहे. महाराष्ट्र सरकारकडे अनेक वर्षांपासून विविध मागण्या प्रलंबित आहे. महाराष्ट्र राज्य अंगणवाडी कर्मचारी कृती समितीच्यावतीने सतत याबाबत पाठपुरावा करण्यात आलेला आहे.
सविस्तर मागण्या पालकमंत्र्यांना दिलेल्या निवेदनात नमूद केलेल्या असून त्यात प्रामुख्याने अंगणवाडी कर्मचाऱ्यांना शासकीय कर्मचाऱ्यांचा दर्जा देणे, मानधन वाढीचे आश्वासन पूर्तता करणे, माननीय सर्वोच्च न्यायालय रीट पिटीशन ३१५३/२०२२ अन्वये अंगणवाडी कर्मचारी पेमेंट ऑफ ग्रॅज्युईटीनुसार ग्रॅज्युईटी मिळणेस पात्र आहे, असा निर्णय न्यायालयाने २५ एप्रिल रोजी दिलेला आहे.
या निर्णयाची अंमलबजावणी विनाविलंब पूर्वालक्षी प्रभावाने करण्यात यावी. संदर्भीय पत्रांमध्ये नमूद केल्याप्रमाणे मुख्यमंत्री व उपमुख्यमंत्री, मंत्री यांच्याशी झालेल्या बैठकीत मान्य केलेल्या मुद्द्याबाबत तातडीने निर्णय घेणे तसेच अंगणवाडी सेविका व मदतनीस यांना वेतन श्रेणी लागु करण्यात यावी. पेन्शन लागू करण्यात यावी. मिनी अंगणवाडी मोठी करण्यात यावी. अंगणवाडी मदतनिसांना अंगणवाडी सेविकेप्रमाणे पेमेंट असावे. अंगणवाडी केंद्र हे फक्त भात शिजवण्यासाठी नव्हे तर देशांमध्ये सुदृढ पिढी निर्माण करण्यासाठी सतत कार्यरत आहे. याचीही दखल घ्यावी.
कोविड २०१९ च्या विषाणू संसर्ग काळातही जीवाची पर्वा न करता किती मानधन मिळते याचा विचार न करता अंगणवाडी सेविका व मदतनीस यांनी दोन वर्ष महाराष्ट्र सरकारच्या निर्देशानुसार कामकाज केलेले आहे. या कालावधीमध्ये देखील आमच्या मागण्याबाबत तत्कालीन सरकारने कोणताही विचार केला नाही व आम्हाला न्याय दिला नाही.
त्यामुळे राज्यव्यापी बेमुदत संपात साई श्रद्धा अंगणवाडी संघटना सहभागी झाली आहे. सरकारने संपाची तातडीने दखल घेत संगमनेर तालुक्यातील अंगणवाडी सेविका, मिनी अंगणवाडी सेविका, अंगणवाडी मदतनीस यांना न्याय द्यावा. असे या निवेदनात म्हटले आहे.
पालकमंत्र्यांना निवेदन देतेवेळी महाराष्ट्र साई श्रद्धा अंगणवाडी महिला संघटनेच्या तालुका अध्यक्ष अनिता वाकचौरे, उपाध्यक्ष रतन एखंडे, सचिव प्रमिला निळे, कार्याध्यक्ष मंगल गुंजाळ, भारती जोंधळे, ललिता चकोर, सरला सानप आदींसह तालुक्यातील अंगणवाडी सेविका व मदतनीस व मिनी सेविका उपस्थित होत्या.
