महाराष्ट्र संवाद न्यूज
कोपरगाव :
कोपरगावचे तहसीलदार विजय बोरुडे यांच्यावर परिचारिकेचा विनयभंग करत कर्मचाऱ्यांशी असभ्य वर्तन केल्याच्या कारणावरून पोलिसांत गुन्हा दाखल करण्यात आला आहे. हा गुन्हा खोटा असल्याचे म्हणत मंगळवारी (ता. २९) सकाळपासून कोपरगाव तहसील कार्यालयाच्या प्रवेशद्वारावर तलाठी व महसूल कर्मचारी संघटनेच्यावतीने काम बंद आंदोलन सुरू करण्यात आले.
कोपरगावचे तहसीलदार विजय बोरुडे हे शनिवारी सकाळी ग्रामीण रुग्णालयाला भेट देण्यासाठी गेले असता, त्या ठिकाणी उपस्थित परिचारिका आणि कर्मचाऱ्यांशी असभ्य वर्तन केल्याचा आरोप त्यांच्यावर ठेवत त्यांच्याविरोधात परिचारिकेने पोलीस ठाण्यात दिलेल्या फिर्यादीवरून शहर पोलीस ठाण्यात विनयभंगाचा गुन्हा दाखल करण्यात आला आहे.
हा गुन्हा खोटा असल्याचे म्हणत तलाठी व महसूल कर्मचारी संघटनेच्या वतीने काम बंद आंदोलन करण्यात आले. याशिवाय सामान्य नागरिक, विविध सामाजिक संघटना आणि पक्ष तहसीलदार बोरुडे यांच्या समर्थनार्थ समोर आले आहेत. तहसीलदारांवरील कारवाई मागे घ्यावी, या मागणीसाठी जन आंदोलन उभारण्याचा इशारा निवेदनांमधून देण्यात आला आहे.
यात आमदार बच्चू कडू यांचा प्रहार जनशक्ती पक्ष, कोपरगाव तालुका कोतवाल संघटना, महाराष्ट्र राज्य तलाठी संघ, कोपरगाव तालुका महसूल कर्मचारी संघटना आदींचा समावेश आहे.
