महाराष्ट्र संवाद न्यूज
महिला आणि युवतींचे सबलीकरण, आरोग्याच्या प्रश्नांवर काम करणाऱ्या एकविरा फाउंडेशनच्या माध्यमातून महिला दिनाचे औचित्य साधित ८ ते १० मार्च दरम्यान महिलांच्या क्रिकेट कुस्ती बॅडमिंटन आणि रस्सीखेच स्पर्धांचा थरार रंगणार असल्याची माहिती एकविरा फाउंडेशनच्या अध्यक्ष डॉ. जयश्री थोरात यांनी दिली.
राज्याचे माजी मंत्री काँग्रेसचे विधिमंडळ पक्ष नेते आमदार बाळासाहेब थोरात यांच्या मार्गदर्शनाखाली एकविरा फाउंडेशनच्या माध्यमातून प्रथमत:च या स्पर्धेचे आयोजन करण्यात आले आहे. महिला आणि युवतींसाठी टेनिस बॉल क्रिकेट, बॅडमिंटन, कुस्ती आणि रस्सीखेच स्पर्धा संगमनेर मधील सहकार महर्षी भाऊसाहेब थोरात क्रीडा संकुलात होणार आहेत.
थोरात म्हणाल्या, आठ मार्च हा जागतिक महिला दिन म्हणून सर्वत्र साजरा होतो. यानिमित्त संगमनेरमध्ये दरवर्षी महिलांसाठी विविध उपक्रम राबवले जातात. महिला सर्व क्षेत्रात पुरुषांबरोबर काम करत आहेत हे सर्वांसाठी अभिमानास्पद आहे. यावर्षी महिला क्रिकेटमध्ये आयपीएल सुरू होत असून यामध्ये संगमनेर तालुक्यातील मुलींचा सहभाग आहे.
सहकार महर्षी भाऊसाहेब थोरात क्रीडा संकुलामध्ये होणाऱ्या भव्य टेनिस बॉल क्रिकेट स्पर्धेत तालुक्यातील युवतींचे विविध क्रिकेट संघ सहभागी होणार आहेत. तसेच राज्यभरातूनही काही मुलींचे संघ सहभागी होणार आहेत. या संघाना ड्रेस कोड देण्यात आले असून स्पर्धेसाठी मैदान, एलईडी व्यवस्था, कॉमेंट्री व्यवस्था, बैठक व्यवस्था, खेळाडूंसाठी स्वतंत्र व्यवस्था आदी स्पर्धेची अद्यावत तयारी करण्यात आली आहे.
याचबरोबर शालेय व महाविद्यालय विद्यार्थिनी, तरुणी व महिलांसाठी बॅडमिंटन कुस्ती व रस्सीखेच स्पर्धेचे आयोजनही याच क्रीडा संकुलात करण्यात आले आहे. यासाठीही सर्व अत्याधुनिक सुविधा पुरविण्यात येणार आहेत. या स्पर्धेत जास्तीत जास्त महिला, तरुणी व विद्यार्थिनींनी सहभाग घ्यावा, असे आवाहन करण्यात आले.
