महाराष्ट्र संवाद न्यूज
संगमनेर:
जुनी पेन्शन योजना लागू करावी या मुख्य मागणीसह अन्य मागण्यासाठी राज्यभरातील विविध शासकीय, निमशासकीय कर्मचाऱ्यांनी मंगळवारपासून (१४ मार्च) संपावर जाण्याचा निर्णय घेतला आहे या संपामध्ये संगमनेर नगर परिषदेतील कर्मचारीदेखील सहभागी होणार आहेत.
संपामध्ये सहभागी होत असल्याच्या आशयाचे पत्र नगर परिषदेचे मुख्याधिकारी राहुल वाघ यांना देण्यात आले आहे. या संपामध्ये अत्यावश्यक सेवेतील कर्मचारी देखील सहभागी होणार असल्याने पालिकेतील अत्यावश्यक सेवा कोसळण्याची चिन्हे आहे.
राज्यातील नगरपरिषदा, नगरपंचायती, संवर्ग अधिकारी, स्थानिक नगर परिषद कर्मचारी, रोजंदारी कर्मचारी यांच्या विविध मागण्या तसेच जुनी पेन्शन लागू करणेबाबत वेळोवेळी नगरपरिषद प्रशासन संचनालय यांना निवेदन देण्यात आलेले आहे. तसेच नगर विकास मंत्री यांच्यासोबत बैठक होऊनही अद्यापपर्यंत नगरपरिषद , नगरपंचायत व संवर्ग अधिकारी व कर्मचाऱ्यांच्या विविध मागण्यांसह जुनी पेन्शन योजना लागू करणे बाबतची मागणी प्रलंबित आहे.
वरील मागण्यासंदर्भात सर्व संघटनामार्फत वेळोवेळी निवेदन सादर करून विनंती करूनही शासनाने अद्यापपर्यंत कोणताही सकारात्मक निर्णय घेतलेल्या नाही. राज्यातील सर्व संघटनांनी एकत्रित येऊन महाराष्ट्र राज्य नगरपालिका महासंघ तयार करण्यात आलेला आहे. कर्मचाऱ्यांच्या मागण्यांवर कोणताही निर्णय होत नसल्याने दिनांक १३ मार्च रोजी काळ्या फीत लावून शासनाचा निषेध व्यक्त करण्यात येणार आहे.
तर १४ मार्चपासून संगमनेर नगर परिषदेच्या सफाई कामगार व अत्यावश्यक सेवांसह इतर सेवेतील सर्व कर्मचारी बेमुदत संपावर जात असल्या संदर्भातील निवेदन उपमुख्याधिकारी सुनील गोरडे, शहर अभियंता राजेंद्र सुतावणे, अभियंता पंकज मुंगसे, अश्विन पुंड, योगेश मुळे, सूर्यकांत गवळी, विशाल कोल्हे यांच्यासह नगरपरिषदेच्या विविध विभागातील अधिकारी, कर्मचाऱ्यांच्या वतीने मुख्याधिकारी राहुल वाघ यांना देण्यात आले.
