महाराष्ट्र संवाद न्यूज
संगमनेर:
काँग्रेसचे माजी प्रदेशाध्यक्ष व विधिमंडळ पक्ष नेते आमदार बाळासाहेब थोरात यांच्या मार्गदर्शनाखाली कार्यरत असणाऱ्या सहकार महर्षी भाऊसाहेब थोरात सहकारी साखर कारखान्याचे कार्यकारी संचालक जगन्नाथ भाऊराव घुगरकर यांची राष्ट्रीय पातळीवरील को जनरेशन असोसिएशन ऑफ इंडियाच्या संचालकपदी बिनविरोध निवड झाली आहे.
स्वातंत्र्यसेनानी सहकार महर्षी भाऊसाहेब थोरात यांच्या आदर्श शिस्तीवर वाटचाल करणाऱ्या या कारखान्याने आमदार बाळासाहेब थोरात यांच्या मार्गदर्शनाखाली देशातील सहकारासाठी दिशादर्शक काम केले आहे. मागील हंगामात 15 लाख 53 हजार मेट्रिक टनाचे उच्चांकी गाळप करताना दरवर्षी सातत्याने विक्रमी भाव दिला आहे.
याचबरोबर आमदार बाळासाहेब थोरात यांच्या नेतृत्वाखाली पुढील पन्नास वर्षाचे नियोजन करून या कारखान्याने 5500 मेट्रिक टन क्षमता व 30 मेगावॅट वीज निर्मितीचा नवीन प्रकल्प कार्य सुरु केला आहे. हा प्रकल्प सहकारातील कारखानदारीसाठी मार्गदर्शक ठरला. कारखाना कामकाज, व्यवस्थापन, कामगार कल्याण, सभासद, शेतकरी या सर्वांच्या बरोबर समन्वय आणि उत्कृष्ट गुणवत्ता यामुळे घुगरकर यांना दोन महिन्यापूर्वी इंडस्ट्री एक्सलन्स हा राष्ट्रीय पातळीवरील पुरस्कार मिळाला होता.
आता को जनरेशन असोसिएशन ऑफ इंडियाच्या पंचवार्षिक संचालकपदी घुगरकर यांची निवड झाल्याने संगमनेरच्या सहकाराच्या शिरपेचात आणखी एक मानाचा तुरा रोवला आहे.
घुगरकर यांचे विधिमंडळ पक्षनेते आमदार बाळासाहेब थोरात, माजी आमदार डॉ. सुधीर तांबे, आमदार सत्यजित तांबे, दुर्गाताई तांबे, कॅन्सरतज्ञ डॉ. जयश्री थोरात, रणजीतसिंह देशमुख आदींनी अभिनंदन केले आहे.
