महाराष्ट्र संवाद न्यूज
संगमनेर:
मद्यधुंद अवस्थेत ग्रामपंचायत कार्यालयात आलेल्या व्यक्तीने ग्रामविकास अधिकाऱ्यास शिवीगाळ धक्काबुक्की करत कार्यालयात कोंडून घेतले नंतर पुन्हा येत ग्राम विकास अधिकाऱ्यांच्या केबिनचे नुकसान करत शासकीय कामात अडथळा आणल्याची घटना संगमनेर तालुक्यातील अंभोरे येथे घडली आहे.
या संदर्भात ग्रामविकास अधिकारी अरुण गोविंद जेजुरकर (वय ५० वर्षे, रा. गुंजाळवाडी, ता. संगमनेर) यांनी दिलेल्या फिर्यादीवरून विशाल संजय गायकवाड याच्या विरोधात संगमनेर तालुका पोलीस ठाण्यात गुन्हा दाखल करण्यात आला आहे.
या संदर्भात अधिक माहिती अशी, आरोपी विशाल गायकवाड हा शुक्रवारी दुपारी तीन वाजण्याच्या सुमारास अंभोरे ग्रामपंचायत कार्यालयात मद्यधुंद अवस्थेत आला होता. त्याने गाय गोठा यादी दाखविण्याची मागणी ग्रामविकास अधिकारी जेजुरकर यांच्याकडे केली असता जेजुरकर यांनी त्याला ‘तू आता दारूच्या नशेत आहेस, उद्या सकाळी ये’, असे म्हटल्याचा राग आला आणि मला आत्ताच्या आत्ता गाय गोठा यादी पाहिजे असे म्हणत गायकवाड याने जेजुरकर यांना शिवीगाळ करण्यास सुरुवात केली. जेजुरकर यांनी तु शिवीगाळ करू नको, असे समजावून सांगत असताना गायकवाड यांनी जेजुरकर यांच्या शर्टची गचांडी धरून धक्काबुक्की केली.
त्यावेळी रामनाथ दशरथ बर्डे गणेश भिमराज साळवे यांनी गायकवाड याला कार्यालयाबाहेर काढले असता गायकवाड याने बाहेर आल्यावर कार्यालयाला बाहेरून कडी लावून घेतली आणि फिर्यादी आणि साक्षीदार यांना बाहेर जाण्यास अडथळा निर्माण करीत सरकारी कामात अडथळा आणला. त्यामुळे फिर्यादी जेजुरकर यांनी गायकवाड त्याच्या चुलते एकनाथ गायकवाड यांना फोन करून बोलावून घेतले. तेथे आल्यानंतर एकनाथ गायकवाड यांनी ग्रामपंचायत कार्यालय उघडून आरोपी विशाल गायकवाड याला आपल्यासोबत नेले.
त्यानंतर काही वेळाने आरोपी गायकवाड हा पुन्हा हातामध्ये रॉड घेऊन ग्रामपंचायत कार्यालयात आला. त्याने हातातील रॉडने ग्रामसेवकाच्या केबिनचा दरवाजा तोडत नुकसान केले तसेच जेजुरकर यांना जीवे मारण्याची धमकी दिली. अशा आशयाच्या तक्रारीवरून गायकवाड यांच्या विरोधात भारतीय दंड विधानसभेच्या विविध कलमानुसार संगमनेर तालुका पोलीस ठाण्यात गुन्हा दाखल करण्यात आला आहे. पोलीस निरीक्षक देविदास ढुमणे पाटील यांच्या मार्गदर्शनाखाली पोलीस उपनिरीक्षक राहुल सानप पुढील तपास करत आहेत.
