महाराष्ट्र संवाद न्यूज
शिर्डी:
आपली संस्कृती पुढे नेताना रुबिक क्यूब सारख्या साहित्याच्या माध्यमातून तयार केलेली देशातील सर्वात भव्य साई प्रतिमा शिर्डीत येणाऱ्या साई भक्तांच्या आकर्षणाचे केंद्र बनेल. साईतीर्थ हे संस्कारांची शिकवण देणारे आधुनिक तीर्थक्षेत्र असल्याचे प्रतिपादन सराला बेटाचे महंत रामगिरी महाराज यांनी केले.
साई तीर्थ थीम पार्कमध्ये चिन्मय प्रभू या तरुणाने तयार केलेल्या देशातील सर्वात मोठ्या रुबिक क्यूब साई प्रतिमेच्या उद्घाटन सोहळ्यात ते बोलत होते. यावेळी मालपाणी उद्योग समूहाचे संचालक डॉ. संजय मालपाणी उपस्थित होते.
रामगिरी महाराज म्हणाले, आजची तरुण पिढी भारतीय संस्कृती आणि परंपरांपासून दूर चालली आहे, अशा पिढीला आधुनिक तंत्रज्ञांचा वापर करून भारतीय संस्कृती आणि आपल्या समृद्ध वारशाची ओळख करून देण्याचे काम साईतीर्थ या आधुनिक तीर्थक्षेत्राच्या माध्यमातून मालपाणी परिवार करीत आहे.
डॉ. मालपाणी म्हणाले, शिर्डीत येणाऱ्या साई भक्तांना साई दर्शनानंतर आधुनिक तंत्रज्ञानाचा वापर करून साईंची महती सांगण्याचे काम आम्ही साईतीर्थच्या माध्यमातून करीत आहोत.
उद्घाटन समारोहानंतर महंत रामगिरी महाराज यांनी उपस्थित मान्यवर व शिर्डीतील पत्रकारांसमवेत साईतीर्थ थीम पार्कमधील तीर्थयात्रा, द्वारकामाई, लंका दहन फाइव्ह डी शो आणि सबका मलिक एक या कार्यक्रमाचा आनंद घेतला. यावेळी सराला बेटाचे विश्वस्त मधु महाराज, बाळासाहेब कापसे, नीलेश जपे, बाळासाहेब चिडे यांच्यासह सराला बेटाच्या भक्त परिवाराचे सदस्य कमलाकर कोते, संदीप पारख, तुषार मते, वैभव रत्नपारखी आदी मान्यवर उपस्थित होते.
कार्यक्रमाचे सूत्रसंचालन डॉ. संतोष खेडलेकर यांनी केले. कार्यक्रमाच्या यशस्वितेसाठी अनुप बजाज, सचिन डांगे, मधुसूदन शिंदे, पार्श्व चोरडिया, अशोक जेजुरकर, रोहित कराड, गौतम खवले आदींनी विशेष परिश्रम घेतले.
साईतीर्थ थीम पार्कमध्ये ४ हजार २१२ रुबिक क्यूबचा उपयोग करून मुंबईस्थित चिन्मय प्रभू या युवकाने साई प्रतिमा तयार केली आहे. त्याच्या या विक्रमाची इंडिया बुक ऑफ रेकॉर्डमध्ये नोंद करण्यात आली आहे. या प्रतिमेचा अनावरण सोहळा शुक्रवारी आयोजित करण्यात आला होता. यावेळी चिन्मय प्रभू व त्याला ही प्रतिमा साकारण्यासाठी मदत करणाऱ्या प्रिन्स त्रिवेदी तसेच चिन्मयच्या आई वडिलांचा महंत रामगिरि महाराजांच्या हस्ते सन्मान करण्यात आला.
