थोरात कारखान्याचा गुरुवारी गळीत हंगाम सांगता समारंभ; काँग्रेस नेते आमदार थोरात यांच्या उपस्थितीत सेवानिवृत्त सेवकांचा स्नेहमेळावा

महाराष्ट्र संवाद न्यूज
संगमनेर :
सहकारासाठी दीपस्तंभ ठरलेल्या सहकारमहर्षी भाऊसाहेब थोरात सहकारी साखर कारखान्याच्या सन 2022 – 23 या गळीत हंगामाचा सांगता समारंभ व सेवानिवृत्त सेवकांचा स्नेहमेळावा गुरुवारी (30 मार्च) सकाळी 9 वाजता काँग्रेस विधिमंडळ पक्षनेते आमदार बाळासाहेब थोरात, माजी आमदार डॉ. सुधीर तांबे, कांचनताई थोरात यांच्या उपस्थितीत व चेअरमन बाबा ओहोळ यांच्या अध्यक्षतेखाली आयोजित करण्यात आल्याची माहिती देण्यात आली आहे.
माजीमंत्री आमदार बाळासाहेब थोरात यांच्या मार्गदर्शनाखाली मागील वर्षी कारखान्याने 15 लाख 53 हजार मेट्रिक टनाचे उच्चांकची गाळप केले होते. तर या हंगामात 10 लाख मेट्रिक टनाच्यावर गाळप झाले आहे.
सभासद, शेतकरी, कामगार ऊस उत्पादक या सर्वांच्या हिताचे निर्णय घेत कारखान्याला राष्ट्रीय व राज्य पातळीवर विविध पुरस्कार मिळाले आहेत. संगमनेर तालुका हा एक परिवार असून कारखान्यात अनेक वर्ष सेवा देऊन सेवानिवृत्त झालेल्या कर्मचाऱ्यांचा स्नेहमेळावा व आयुष्याची 75 वर्षे पूर्ण करणाऱ्या निवृत्त कर्मचाऱ्यांचा विशेष सत्कार यावेळी करण्यात येणार आहे.
याप्रसंगी आमदार सत्यजित तांबे, बाजीराव खेमनर, दुर्गाताई तांबे, ॲड. माधवराव कानवडे, रणजीतसिंह देशमुख, कॅन्सरतज्ञ डॉ. जयश्री थोरात, राजेश मालपाणी, सोमेश्वर दिवटे यांच्यासह तालुक्यातील व अमृत उद्योग समूहातील विविध संस्थांचे पदाधिकारी उपस्थित राहणार आहेत.
तरी या कार्यक्रमासाठी तालुक्यातील शेतकरी, ऊस उत्पादक, सभासद व कार्यकर्त्यांनी मोठ्या संख्येने उपस्थित राहावे असे आवाहन संचालक मंडळ व कार्यकारी संचालक जगन्नाथ घुगरकर यांनी केले आहे.