टोल भरण्यास नकार देत टोल कर्मचाऱ्यांना तलवारीचा धाक दाखवत मारहाण, एका कर्मचाऱ्याचा हात मोडला: अज्ञात आरोपींचा शोध सुरू

महाराष्ट्र संवाद न्यूज
संगमनेर:
टोल नाक्यावर टोल भरण्यास नकार देत टोल नाक्यावरील कर्मचाऱ्यांना छोटा हत्ती पिकअपमधून आलेल्या अज्ञात ५-६ जणांनी दमदाटी शिवीगाळ करीत मारहाण केल्याचा प्रकार शनिवारी रात्री साडेदहा वाजण्याच्या सुमारास शहरा नजीकच्या हिवरगाव पावसा टोल नाक्यावर घडला. यात टोल नाक्यावरील एका कर्मचाऱ्यांचा हात मोडला आहे.
संगमनेर तालुका पोलीस ठाण्यात यासंदर्भात जखमी योगेश सुभाष काळे याने फिर्याद दिली आहे. टोल नाक्यावर फिर्यादी काळे हा टोल कलेक्शन करत असताना छोटा हत्ती पीकअपमधून पाच ते सहा जण टोल नाक्यावर आले होते. फिर्यादीने त्यांच्याकडे टोलची रक्कम मागितले असता त्यांनी तोंड न देता फिर्यादी सोबत वाद घालण्यास सुरुवात केली. त्यामुळे टोल नाक्यावरील सुपरवायझर विलास राहणे व भागवत यांनी पीकअपमधील व्यक्तींना समजावून सांगण्याचा प्रयत्न केला.
यावेळी पीकअपमधील सर्वांनीच खाली उतरत टोल भरणार नाही, असे म्हणत कर्मचाऱ्यांना शिवीगाळ, दमदाटी करून सुपरवायझर राहणे याची गच्ची पकडली. त्यामुळे फिर्यादी योगेश काळे वाद मिटविण्यासाठी मध्ये पडला असताना पाच ते सहा जणांपैकी एकाने फिर्यादी काळे याला उचलून खाली आपटले. त्यामुळे त्याच्या डाव्या हाताच्या कोपऱ्यात मार लागून हात फ्रॅक्चर झाला. याच दरम्यान छोटा हत्ती पिकअप मधील एकाने तलवारीने धाक दाखविण्याचा प्रयत्न केला. आणि घटनास्थळावरून सर्वजण निघून गेले.
या संदर्भात रविवारी सकाळी संगमनेर तालुका पोलीस ठाण्यात फार्म अॅक्ट सह विविध कलमान्वये पाच ते सहा जणांवर गुन्हा दाखल करण्यात आला असून पोलीस निरीक्षक देविदास ढुमणे यांच्या मार्गदर्शनाखाली पोलीस आरोपींचा शोध घेत असून पोलीस कर्मचारी ए. बी. पारधी पुढील तपास करीत आहेत.